Манила хотын дарга Франсиско Домагосо Филиппиний ерөнхийлөгчийн сонгуульд дарангуйлагч агсны хүү, бага Фердинанд Маркост ялагдсанаа хүлээн зөвшөөрч, шинэ засаг захиргааг дэмжихийг дэмжигчдэдээ уриалжээ.
“Би сенатч асан Фердинанд Маркост сонгуульд ялсанд нь баяр хүргэж байна. Сонгуулийн албан ёсны дүн удахгүй гарна гэж найдаж байна” гэж тэрбээр мягмар гарагт сонгогчдодоо хандаж үг хэлэхдээ мэдэгджээ.
“Шинэ удирдлагад бид боломж олгох ёстой” гэж Франсиско Домагосо хэлжээ. Урьдчилсан мэдээллээр, тэрбээр 1.8 сая, бага Маркос 30.9 сая санал авсан байна.
Үүний зэрэгцээ тэрбээр Давао хотын захирагч, Филиппиний одоогийн Ерөнхийлөгч Родриго Дутертегийн охин Сара Дутерте-Карпиод баяр хүргэв. Сара Дутерте-Карпио дэд ерөнхийлөгчийн сонгуульд тэргүүлж байгаа юм. “Элэг нэгтнүүдийнхээ саналыг хүндэтгэцгээе” гэж өдгөө 47 настай улстөрч нэмж хэлжээ. Домагосо Манила хотын даргын албан тушаалаа зургаадугаар сарын 30-нд хүлээлгэн өгнө.
Тавдугаар сарын 9-нд филиппинчүүд 70 мянган санал авах байранд шинэ ерөнхийлөгчөө төдийгүй дэд ерөнхийлөгч, сенат, конгрессын гишүүд, мөн бусад хэдэн мянган удирдах албан тушаалтныг сонгожээ. Үндсэн хуулийн дагуу дахин сонгогдох боломжгүй болсон өдгөө 77 настай Дутерте зургаадугаар сарын 30-нд албан тушаалаасаа бууна.
Montsame.mn
