Украины дайнд оролцсоныхоо төлөө барууны орнуудын хориг арга хэмжээнд өртөж, “Мариуполийн яргачин” хэмээн цоллуулж байсан Оросын хурандаа генерал Михаил Мизинцевийг Батлан хамгаалахын дэд сайдын албан тушаалаас нь огцруулжээ.
Мизинцев дайны эхний саруудад Украины Мариуполь хотыг бүслэх ажиллагааг зохион байгуулж, өнгөрсөн есдүгээр сард ложистик, хангамж хариуцсан Батлан хамгаалахын дэд сайдаар томилогдсон юм.
Европын холбоо өнгөрсөн зургадугаар сард Мизинцевийн эсрэг хориг арга хэмжээ авсан бөгөөд ингэхдээ түүнийг Мариуполийн яргачин хэмээн нэрлээд, хотыг бүслэх ажиллагаа “хүнлэг бус” явагдсанд түүнийг голчлон буруутгаж байв.
Мизинцевийг албан тушаалаас нь огцруулсан тухай Оросын цэргийн суртал ухуулагч Александр Сладков болон “РБК” мэдээллийн сайт мэдээлжээ. Аль аль нь шалтгааныг нь тайлбарлаагүй байна.
Оросын Батлан хамгаалах яам тайлбар өгөх хүсэлтэд хариу өгөөгүй бол Кремль энэ талаар юу ч хэлэх боломжгүй гэж мэдэгдээд, Батлан хамгаалах яамнаас тодруулахыг зөвлөжээ.
Ерөнхийлөгч Владимир Путин дайны туршид цэргийн дээд албан тушаалтнуудаа хэд хэдэн удаа ямар ч тайлбаргүйгээр сольсон. Сүүлд нэгдүгээр сард Сергей Суровикиныг албан тушаалаас нь чөлөөлж, оронд нь жанжин штабын дарга Валерий Герасимовыг Украин дахь “цэргийн тусгай ажиллагаа”-г удирдуулахаар томилсон байдаг.
Орос улс Украины нутаг дэвсгэрийн зургааны нэгээс илүү хувийг эзэлсэн ч 14 сар үргэлжилсэн дайны явцад их хэмжээний хохирол амсаад байгаа. Өнгөрсөн долдугаар сараас хойш дорвитой ахиц гаргаагүйгээс гадна Харьков, Херсон зэрэг хотоос ухрахаас өөр аргагүйд хүрсэн бол Украины зүүн хэсэгт орших Бахмут хотыг бүрэн хяналтдаа авахын тулд олон сарын турш тэмцэж байна.
Үүний зэрэгцээ, Украины хүлээгдэж буй сөрөг довтолгоонд бэлдэж байна.
Эх сурвалж: Reuters
