Мексик улсад экспортын текиланд есөн тонн хар тамхины төрлийн метамфетаминыг уусган хил давуулах гэж оролдсон этгээдүүдийг баривчилжээ.
CNN зэрэг гадаадын хэвлэл мэдээллийн хэрэгслүүдийн орон нутгийн цагаар 25-ны өдөр мэдээлснээр, Мексикийн тэнгисийн цэргийн хүчин өмнөх өдөр нь Колима мужийн Манзанилло боомтоор экспортлох гэж байсан 11520 лонх текиланд мансууруулах бодис уусгасан байсныг илрүүлж, бүгдийг нь хураан авчээ. Үнэрч нохой болон химийн бодис таних системээр илрүүлсэн текилад 8640 килограмм орчим метамфетамин уусгасан байв.
Тус текила нь хамгийн багадаа нэг жил дарсан “Анежо" зэрэглэлтэй байсан бөгөөд бараан хув эсвэл хүрэн өнгөтэй байжээ. Гэвч хууль сахиулагчдын зүгээс ямар брэндийн бүтээгдэхүүн байсан талаар олон нийтэд мэдэгдээгүй ба тус текила зах зээлд нийлүүлэгдсэн эсэх нь одоогоор тодорхойгүй байгаа юм.
Сүүлийн жилүүдэд дэлхийн улс орнуудад хар тамхи зөөвөрлөх, тээвэрлэх арга улам боловсронгуй болж байгааг энэ удаагийн хэргээс ч мөн харж болохоор байна. Амттан болон тоглоом зэргийн сав баглаа боодолд савлаж авчирдаг арга нэгэнт ард хоцорсон ба бэлхүүс, гуя зэрэг биеийнхээ аль нэг хэсэгт хар тамхи наах, эсвэл залгих зэрэг “bodypacking” арга сүүлийн үед ихээр дэлгэрэх болоод байгаа билээ.
Түүнчлэн өнгөрөгч 17-ны өдөр Италийн Сицилийн арлын ойролцоох далайд үл мэдэгдэх 70 орчим биет хөвж байсныг олсон нь 2 тонн кокаин байсан бөгөөд энэ нь 400 сая еврогоор үнэлэгдсэн байна. Орон нутгийн эрх баригчдын мэдэгдэж буйгаар тус биетүүд нь байршил тогтоох төхөөрөмжөөр тоноглогдсон байснаас харахад хар тамхины наймаачид нэгэндээ шилжүүлэх зорилгоор түр хугацаанд далайд хадгалж байсан болов уу гэх таамгийг дэвшүүлжээ.
Эх сурвалж: Chosun
