УИХ-ын гишүүдийн чуулганы хуралдаанд оролцсон ирц болон хууль эцэслэн батлахад өгсөн саналыг олон нийтэд ил тод, нээлттэй болгохоор болжээ. Энэ талаар УИХ-ын дарга Г.Занданшатар чуулганы нэгдсэн хуралдааны үеэр гишүүдэд хандан мэдэгдлээ. Тэрбээр, "УИХ-ын гишүүд хуралдаанд хэрхэн оролцож байгаа ирц, хууль эцэслэн батлахад дэмжсэн, дэмжээгүй саналыг олон нийтэд ил тод мэдээлнэ. Учир нь энэ төрлийн мэдээллийг нээлттэй авч байх саналыг ТББ-ууд болон иргэдээс олон давтамжтай тамгын газарт хаяглан ирүүлж байгаа. Үүнийг бид судалж үзээд Нийтийн мэдээллийн ил тод байдлын тухай хуулийн дагуу нээлттэй олон нийтэд мэдээлэхээр боллоо. Шаардлагатай бол зарим журамласан заалтуудад өөрчлөлт оруулж мэдээллийг ил тод байлгана. Тиймээс өнөөдрөөс эхлэн гишүүдийн ирц болон хууль батлахад өгсөн саналыг олон нийтэд нээлттэй болгож иргэдийн мэдэх эрхийг хангахыг Ёс зүй сахилга хариуцлагын байнгын хороо, УИХ-ын тамгын газарт үүрэг болгож байна" гэлээ.
Т.СОЁЛ