Хөгжлийн Банкны гэх хэргийн гэм буруугийн шүүх хуралдаан Улаанбаатар чуулгын байранд найм дахь өдрөө үргэлжилж байна.
"Монгол мах экспо" ХХК, "Монгол эм импекс концерн" ХХК-д олгосон зээлийн асуудлыг хэлэлцэх үеэр “хахууль өгөх” гэмт хэрэгт холбогдуулан Хөгжлийн Банкны дэд захирлаар ажиллаж байсан Б.Чойжилжалбуу мэдүүлэг өгөв.
Тэрбээр "Миний удирдлага дор дөрвөн хэлтэс байсан. Банкны зээлд санал өгөхдөө зах зээл тухайн төсөл хэрхэн бойжиж байгаа ихээхэн хардаг байсан.
Аливаа байгууллагын хамт олон эвтэй, уур амьсгал сайхан байх үүднээс төрсөн өдөр, баяр ёслол тэмдэглэх зүйл Хөгжлийн Банканд байсан. 2017 оны наймдугаар сарын 10-ны өдөр Хөгжлийн Банкны ТУЗ-ийн дарга Б.Даажамбагийн 40 насны ойг тэмдэглэсэн.
Санхүүгийн зах зээлд ажиллаж буй хүмүүс МУИС-ийг, СЭЗИС-ийг төгссөн гэж хоёр хуваагддаг. Хөгжлийн Банкны удирдлагад МУИС-ийг төгссөн ТУЗ-ийн дарга Б.Даажамба, гүйцэтгэх захирал Б.Батбаяр, Зээлийн удирдлагын захирал Ч.Мөнхбаяр, Тэргүүн дэд захирал Ч.Энхбат болон миний бие нар ажиллаж таарсан.
Ажлын бус цагаар үйлдэгддэг арга хэмжээнд миний бие арай дүү нь болохоор бэлэг дурсгалд явах, сөн түших зэрэг байдаг л зүйл болж байсан. Б.Даажамба даргын төрсөн өдрөөр би цалингаа авдаг Төрийн банкны картаар нэг бал авч өгсөн.
Энэ төсөл Хөгжлийн Банканд хандсан нь төрсөн өдрөөс хойш буюу 50-60 хоногийн дараа болсон. Дээрх хоёр компани одоо зах зээлд оршин тогтносоор яваа. Тухайн үедээ зээлийн шалгуур хангасан гэж үзэж байгаа учир зээл олгосон. Зарим шаардлага нь хангагдаагүй учраас цаашдаа олгогдоогүй бөгөөд зээл нь төлөгдөөд явсан" хэмээн ярилаа.