Урин дулаан цаг хаяанд ирж, хаврын уралдаанууд товоо зарлажээ. Үүнд зориулсан сунгаа, үсэргээнүүд болж, унаач хүүхдүүд бэртэж, гэмтэх цаашлаад амь насаа алдах тохиолдлууд бүртгэгдэж эхэлсэн байна.
Тухайлбал, энэ сарын 22-нд Баруун-Урт суманд болсон сунгааны дараа 11 настай эрэгтэй хүүхэд мориноос унаж тархиндаа хүнд гэмтэл аван эмнэлэгт хүргэгдсэн ч гэмтлээ даалгүй нас баржээ. Засгийн газрын тогтоолоор жил бүрийн арваннэгдүгээр сарын 1-нээс тавдугаар сарын 1-ний хугацаанд хурдан морины уралдаан, сунгаа, үсэргээ зохион байгуулахыг хориглосон байдаг.
Харамсалтай нь 2019 онд батлагдсан эл тогтоол амьдрал дээр хэрэгжихгүй өнөөдрийг хүрснийг харамсалтайгаар амьсгал хураасан олон зуун бяцхан зүрх тодхон гэрчилнэ. Тухайлбал, өнгөрсөн онд хурдан морины уралдаан, үсэргээ, сунгаан зохион байгуулахыг хориглосон хугацаанд буюу 2022 оны дөрөвдүгээр сард Багахангай дүүрэгт 11 настай хүү, Дундговь аймгийн Сайнцагаан суманд 14 настай унаач хүү хурдан мориноос унаж, амь насаа алдсан байдаг. Энэ онд ч мөн адил хориглосон хугацаанд зохион байгуулсан үсэргээний үеэр 11 настай хүү тархиндаа хүнд гэмтэл авч, хорвоог орхилоо. Энэ бол олон нийтэд ил болсон жишээ. Үүний цаана хэчнээн хүүхэд энэ мэтээр хохирч, хөгжлийн бэрхшээлтэй иргэдийн эгнээг тэлж байгааг бид таашгүй.
Хэрэгждэггүй тогтоол, хэнэггүй уяач, хүүхдээ "хайрладаггүй" эцэг эхчүүдийн балгаар унаач хүүхдүүдийн эрх ашиг ноцтой зөрчигдөж, эрүүл мэнд, амь насаараа хохирсоор байгаад хяналт тавьж, таслан зогсоох эрх мэдэлтэн алга.
Өнгөрсөн 2022 онд мориноос унаж гэмтсэн 1580 хүн ГССҮТ-д тусламж үйлчилгээ авсан байна. Үүнээс 685 нь хүүхэд байсан бөгөөд 75 хүүхэд нь 2-17 насны унаач хүүхэд байжээ. Харин ХЭҮК-ийн мэдээллээр өнгөрсөн онд долоон хүүхэд хурдан мориноос унаж, амь насаа алдсан байна.
Т.СОЁЛ