"Хөгжлийн банк"-ны гэх 80 хүн, 4 хуулийн этгээдэд холбогдох эрүүгийн хэргийн гэм буруугийн шүүх хуралдаан 7 дахь өдрөө үргэлжилж байна.
УИХ-ын гишүүн Ё.Баатарбилэг энэ хэрэгт яллагдагчаар татагдан, гэм буруугийн шүүх хуралдаанд оролцсон. Тэрээр өнөөдрийн шүүх хуралдаанд мэдүүлэг өгөв.
УИХ-ын гишүүн Ё.Баатарбилэг “ Би түмний нэг. Төрийн албанд ороод удаагүй хэдэн тэрбумаар нь хусчихаад түмний боломжийг булаачихаад өөрсдөө өчнөөн төчнөөн мөнгө хөрөнгө, компани аж ахуйн нэгжтэй байж, үр хүүхдээ гадаадын өндөр төлбөртэй их сургуульд төрийн мөнгөөр сургачихаад олсон дээрээ улам олж, олгархи болж баяжиж байгаа түмэн амьтан байна. Мөрөөрөө байгаа мань мэтийг боорлохоосоо илүүтэйгээр тийм хүмүүст анхаарлаа хандуулах нь зүйтэй. Би ШУА-иас ажлын гараагаа хэлсэн. Ерөнхийлөгчийн Тамгын газар референт, Ерөнхийлөгчийн шадар туслах, сайдын зөвлөх, сайд, аймгийн ИТХ-д хоёр, УИХ-д хоёр удаа сонгогдсон. Над шиг Монгол Улсын засаглалын бүхий л хэлбэр, нутгийн өөрөө удирдах шатны байгууллагад бүх шатанд нь ажилласан хүн УИХ-д цөөн. Би бол дотоод төсөв харахаас илүүтэйгээр гадна дотноос хөрөнгө оруулалт татахсан хэмээн ихээхэн хичээж ажилладаг. УИХ-ын гишүүнээс сонгогдоод “Элэгний эмгэггүй Архангай” төсөл хэрэгжүүлье гээд АНУ-ын харвони эм үйлдвэрлэгч компанитай холбогдож, эм хандивлаач гэдэг хүсэлт өгч, 2.7 сая долларын өртөгтэй эм авч чадсан. Төсөл маш амжилттай хэрэгжсэн. Хандиваар тоног төхөөрөмж их зөөсөн. Хамгийн сүүлд энэ оны нэгдүгээр сард хилийн хориг тавигдаад Лаост айлчлал хийгээд наашлахдаа Солонгосын Самсунгтай уулзаж, ярилцаад компьютер хандиваар авахаар тохиролцоод байсан ч одоогоор хилийн хоригтой сууж байна.
Шүүгч нар миний хувийн зан байдлын тодорхойлолтыг харгалзаж үзээсэй гээд ирцийн мэдээллээ хэлье. Намар, хаврын чуулган 176 удаа хуралдахад миний ирц 176 удаа нэг ч хоцролтгүй байна. Би УИХ-ын үйл ажиллагаанд маш хариуцлагатайгаар оролцож, дуу хоолойгоо өргөдөг. Ямар нэгэн амин хувийн буюу бүлэг фракцын эрх ашиг хөөцөлдөж, дарга дагаж туг шиг намирч явдаг хүн биш. Олон түмнийхээ төлөө өмнөх ажлаа хийгээд чимээгүй яваад байгаа нь буруу мэт харагддаг болж. Анх энэ хэргээр хэвлэлийнхэн надаас асуухад “ Хуурай гүжирт хариу үгүй” гэж хэлсэн. Би буруугүй гэдгээ хэлсэн. Үнэхээр хуурай гүжирт хариу үгүй гэж хэлэх үг олдохгүй юм. Төрийн сүлд харж байгаа байлгүй. Монгол Улсын хууль хяналтын байгууллагынхан, шүүх үнэн мөнийг олох байх гээд өнөөдрийг хүртэл чив чимээгүй л явна. Эцэст нь хэлэхэд Хөгжлийн банк гэх энэ том хэргийн шүүх хуралдаанд суух явцдаа Хөгжлийн банкны гэх энэ шүүх хурал ер нь юу болоод явчихав, ямар учиртай зүйл болов, яагаад ийм олон хүнээр эрүүгийн хэрэгт татаж, сенсааци үүсгэв гэдгийг эргэж харах л хэрэгтэй болж. Нэг талаар үнэхээр эмгэнэлтэй байна. Монголын төр бизнес хийж байгаа баялаг бүтээгч нараа арай өөр нүдээр харах байсан юм биш биз хэмээн харуусаж байна” гэлээ.
