Судан улсын нийслэл Хартоум хотод ширүүн тулаан үргэлжилж байгаагаас үүдэн улс орнууд тус улс дахь дипломатууд хийгээд иргэдээ нүүлгэн шилжүүлэх болжээ.
Ням гарагт л гэхэд АНУ болон Их Британи улс Судан дахь дипломатуудаа тус улсын нутаг дэвсгэрээс гаргасан байна. Дээрх хоёр улсаас гадна дипломатууд хийгээд иргэдээ Судан улсын нутаг дэвсгэрээс гарган авсан улс орны дунд Франц, Герман, Итали, Испани улсууд багтжээ.
АНУ-ын холбогдох албаныхны мэдээлснээр тэд ням гарагт нийт 100 орчим хүнийг нисдэг тэргээр тээвэрлэсэн байна. Мөн тэдний зүгээс Хартоум хот дахь элчин сайдын яамаа хаасныг ч мэдэгдсэн юм. Харин тус улсад хувиараа зорчиж яваа иргэдээ гаргах боломжийн тухайд тэдний мэдэгдсэнээр тус ажиллагаа хэтэрхий эрсдэлтэй байна гэжээ.
АНУ-ын талаас тодорхойлсноор дипломатуудаа гарган авах ажиллагаа “хурдан хийгээд цэвэр” явагдсан гэсэн бол Их Британи улсын хувьд ажиллагаа чамгүй төвөгтэй байсан гэнэ. Гэсэн хэдий ч тэдний зүгээс Судан улс дахь дипломатууд хийгээд тэдний гэр бүлийг амжилттай нүүлгэн шилжүүлжээ. Харин тус улсын нутаг дэвсгэрт үлдсэн британичуудыг гаргах авах боломжийн тухайд Их Британийн Гадаад хэргийн сайд Жэймс Клеверлигийн хэлснээр боломж туйлын хязгаарлагдмал байна гэсэн юм.
ДЭМБ-аас мэдээлж байгаагаар одоогийн байдлаар тулалдааны хүрээнд нийт 400 гаруй хүн амиа алдаад байгаа бол хэдэн мянган хүн шархадсан гэнэ. Харамсалтай нь тулалдаан дуусгавар болох шинж үгүй бөгөөд хүчнийхэн эмнэлгүүдийн үүд хаалгыг барьснаар амиа алдсан хүмүүсийн тоо ойрын ирээдүйд улам нэмэгдэх төлөвтэй байгаа ажээ.
Эх сурвалж: BBC
