Барууны орнуудын Украинд өгөхөөр амласан танкнууд ээлж дараалан зорьсон газраа хүрч байгаа ч тус техникийг хэрхэн ашиглах талаарх сургалт болон тээвэрлэлтийн асуудлаас болж байлдааны хүчийг нэмэгдүүлэх тал дээр тийм ч хурдан нөлөө үзүүлэхгүй байж магадгүй хэмээн CNN суваг орон нутгийн цагаар 23-ны өдөр мэдээлэв.
Испанийн дэмжлэгтэй 6 ширхэг “Leopard 2” танк энэ долоо хоногт Украинд очих болно хэмээн Испанийн Батлан хамгаалахын сайд Маргарита Роблес саяхан мэдэгдсэн юм.
Түүнчлэн өнгөрсөн сарын эхээр Герман болон Их Британи улсуудын тус тус илгээсэн 18 ширхэг “Leopard 2 A6” танк, 14 ширхэг “Challenger 2” танк Украинд очоод байгаа билээ.
АНУ-ын талаас Украины байлдааны талбарт “Аbrams” танкнуудыг аль болох хурдан хүргэх зорилгоор ирэх сараас эхлэн Герман дахь АНУ-ын цэргийн баазад Украины цэргүүдэд тус танкны үйл ажиллагаа болон засвар үйлчилгээний 10 долоо хоногийн сургалтыг хийхээр төлөвлөж байгаа аж. Учир нь орчин үеийн танкнууд нь бүрэн автомат байдлаар загварчлагдсан байдаг тул ашиглалт, засвар үйлчилгээний талаарх нарийвчилсан сургалтад зайлшгүй хамрагдах шаардлагатай байдаг аж.
АНУ-ын зүгээс дэмжлэг үзүүлэхээр амлаад буй хуучин загварын (M1A1) 31 ширхэг “Abrams” танк нь одоогоор бүрэн хэмжээний засвар үйлчилгээнд хамрагдаж байгаа юм.
НАТО-гийн гишүүн орнууд Украины хүсэлтийг үл харгалзан байлдааны гол танк өгөх шийдвэрийг гаргахдаа нэлээд эргэлзэж, хойш суусны эцэст энэ оны нэгдүгээр сард тусламж үзүүлэхээр болсон нь энэ билээ.
Тэгвэл НАТО-гийн гишүүн орнуудын нийлүүлж буй эдгээр танкнууд нь дайны талбарт шууд үр нөлөөгөө үзүүлэх хүртэл багагүй хугацаа шаардагдана хэмээн шинжээчид үзэж буй талаар CNN агентлаг мэдээлэв.
Ялангуяа АНУ-д үйлдвэрлэгдсэн “Abrams” танканд засвар үйлчилгээ хийж сэлбэг, эд ангийг нь авахад нэлээд хугацаа шаардагдах тул ирэхээс нь өмнө бэлтгэл ажлыг сайтар хангах нь чухал байгаа юм.
Сингапурын Үндэсний Их Сургуулийн Ли Куан Югийн нэрэмжит Төрийн бодлогын сургуулийн судлаач Дрю Томпсон "Пентагон логистикийн хүндрэлтэй асуудлуудыг шийдвэрлэх чадвартай ч асар өндөр эрсдэл үүрэх бөгөөд тиймээс ч Европын орнуудын дэмжлэг болгож буй танкнууд Украинд түрүүлж ирсээр байна” хэмээн онцлон тэмдэглэв.
Эх сурвалж: Yonhap
