Дэлхий даяар 2022 онд зэвсэглэлд зарцуулсан хөрөнгийн хэмжээ 3.7 хувиар өсөж, 2.24 их наяд ам.доллар болжээ. Европт энэ үзүүлэлт сүүлийн 30 жилийн хамгийн өндөр өсөлттэй гарсныг Стокхолмын Энхтайвны судалгааны олон улсын хүрээлэн (SIPRI)-гийн тайланд харуулав.
Тодруулбал, цэрэг дайны зардал хамгийн өндөртэй улсуудыг АНУ, Хятад, Орос тэргүүлэв. Энэ гурван улс хамтдаа, дэлхийн нийт зардлын 56 хувийг бүрдүүлжээ. Найм дахь жилээ дараалан өссөн дүнтэй гарч байгаа энэ үзүүлэлтийг Украины байдал, Зүүн Азийн хурцадмал байдал 2022 онд цэргийн зардал өсөх гол хүчин зүйлс болжээ. Европын орнуудын цэргийн зардал 13 хувиар өссөн нь Орос, Украины мөргөлдөөнтэй шууд холбоотой байсан ч тус улсад үзүүлж буй тусламж, ОХУ-аас учирч буй аюул занал бусад улс орнуудыг ч цэргийн төсвөө нэмэгдүүлэхэд хүргэсэн ажээ.
“Сүүлийн жилүүдэд дэлхий даяар ийнхүү цэргийн зардал өсөн нэмэгдэх байдал үргэлжилж буй нь бид бүхэн улам бүр найдвар муутай дэлхийд амьдарч байгааг илтгэж байгаа хэрэг юм. Аюулгүй байдлын салбарт нөхцөл муудаж, ойрын төсөрт сайжрах төлөв харагдахгүй нөхцөлд улс орнууд цэргийн хүчин чадлаа өсгөж бэхжүүлдэг” хэмээн Стокхолмын судалгааны олон улсын хүрээлэнгийн зэвсгийн үйлдвэрлэл, зардлын хөтөлбөр эрхэлсэн ахлах эрдэм шинжилгээний ажилтан Нан Тян онцолсон байна. Төв болон Баруун Европын орнуудын цэргийн зардлын хэмжээ хүйтэн дайны үеийн түвшиндээ эргэн очсоныг илтгэл бичигчид тэмдэглэжээ.
Төв Европт энэ үзүүлэлт 345 тэрбум ам.долларт хүрсэн бол, бодит дүнгээрээ уг үзүүлэлт 1989 оныхоос давж, 2013 оныхоос гэхэд 30 хувиар нэмэгдсэн дүнд хүрсэн байна. Зарим улс орон батлан хамгаалахын зардлаа хэдийнээ нэмэгдүүлсэн бол зарим нь нэмэгдүүлэхээр төлөвлөж байгаагаа мэдэгдээд байгаа билээ. Финланд (36 хувь), Литва (27 хувь), Швед (12 хувь) болон Польш улс (11 хувь) цэргийн зардлаа эрс нэмэгдүүлжээ. Төв, Баруун Европын орнууд ийм шийдвэр гаргахад Украины байдал шууд нөлөөлсөн гэж хүрээлэнгийн шинжээчид үзсэн аж.
