УИХ-ын 2000 оны сонгуулиар бүрдсэн Г.Занданшатар даргатай 76 гишүүнтэй ангид дарга болж үзээгүй хүн бараг л үлдсэнгүй. Засгийн газрын 22 сайдын 16 нь УИХ-ын гишүүн. Үлдсэн 60-аас 22 нь Байнгын хорооны дарга хийсэн. УИХ-ын дарга, дэд дарга, Бүлгийн дарга, түр хороодын дарга гээд сэлгэсэн, сэлгээгүй гээд ер нь бүгд дарга.
Тэдэн дунд онцгой нэг “дарга” бий. УИХ дахь АН-ын бүлгийг толгойлж байгаад “гомдолтой”-гоор буусан учраас АН-ын дарга болох гэж зүтгээд нэг “хөөрхөн” батламж тэврээд хоцорсон нөхөр бий. Онцгой гэхийн учир нь, УИХ-ын гишүүн Д.Ганбат 2012-2016 оны УИХ-ын танхимд дуу чимээ багатайхан нэгэнд тооцогддог байсан бол 2020 онд орж ирэхдээ дуу чимээ ихтэй нэгэн болж хувирсан.
Нэгэн цагт хормойноос нь тас зуурч, гүзээнд наалдсан дэлүү шиг явсан “дарга” –аа “хаан”-ы суудалд ахин залрахгүй гэдгийг мэдэв үү, үгүй зайгаа авч АН-ын дарга С.Эрдэнэ дээр очоод наалдчихсан. Түүнийг Х.Баттулгын “суганы үс” болж, Баянхонгороос УИХ-д заларсныг захын нохой ч мэднэ. Дөрвөн жилийн дараа “бидон” нэртэй л үлдсэн. 2020 оны сонгуульд “Ерөнхийлөгч”-тэй байсныг ачаар Баянхонгороос сонгогдож, УИХ-д АН-ын 11-ийн нэг болж орж ирснээ энэ хүн санахыг хүсэхгүй байгаа. Гэхдээ УИХ-ын гишүүний суудлаас тас зуурах хүсэлдээ хөтлөгдөн, буруу зөрүү, сайн муу нь хамаагүй элдвийг ярьж, аль болох олон удаа камерт өртөх нь л чухал болсон. Өөрөөр хэлбэл, түүнд камерт өртөх “дон” шүгэлчихээд буй.
Ингээд УИХ-ын гишүүн Д.Ганбат камер хаана байна тэнд зогсдог, үг хэлдэг нэгэн болов. Ямар сайндаа л өөрийнхөө асуултад өөрөө хариулж байх билээ дээ. Зөвхөн УИХ-ын чуулган бүрт ямар нэгэн байдлаар үг хэлээд зогсохгүй, С.Эрдэнийн АН-аас хийж байгаа хэвлэлийн хурал бүр дээр Д.Ганбат гишүүн ирж элдэв зүйл ярьдаг болов. Түүний ярьсан зарим зүйлийг бид байтугай өөрөө ч ойлгоогүй гэдэгт итгэлтэй байна. Тухайлбал, УИХ-ын чуулганаар Олон нийтийн сүлжээнд хүний эрхийг хамгаалах тухай хуульд тавьсан Ерөнхийлөгчийн хоригийг хэлэлцэж байхад Д.Ганбат огло харайн үг хэлэв.
Тэрбээр "Өнөөдөр монгол цэргийн өдөр. Дэлхийн хамгийн шилдэг цэргүүдийн өдөр юм. Монгол Улсын Ерөнхийлөгч бид хоёр цэргийн хүмүүс. 150 дугаар мотобуудлагын дайчин хорооны нөхөд. Ерөнхийлөгчийн анхны хориг байх. Ард түмэндээ бэлэг болгоод Ерөнхийлөгчийн хоригийг хүлээж авъя. Та нарын барьж байгаа маш сайхан бэлэг гэж би бас хүлээж авъя” хэмээн яриагаа эхэлсэн. Ерөнхийлөгчтэй өөрийгөө зүйрлээд байгаа юм уу, Ерөнхийлөгчид зулгуйдан зусардаад байна уу. Ямартай ч “гууль нь цухуйна” гэгчээр эрх мэдэлтэй нэгний өмнө тэр зусардан бялдуучлагч гэдэг нь эндээс харагдана.
С.Эрдэнийг хормойдсных АН-ын дэд дарга гэх сэтэр, АН-ын дарга гэсэн нэг батламжтай болж, бас ч үгүй хэвлэлийн хурал хийгээд авсан. Удахгүй намтартаа АН-ын дарга явсан гээд биччихвэл гайхах зүйл үгүй.
Орос Украйны мөргөлдөөнийг ч тэр улстөрд ашиглахаа мартаагүй. Саяхан буюу энэ сарын 20-нд улстөрийн нэрт зүтгэлтэн С.Зориг агсны төрсөн өдрөөр АН-ынхан нэгдэж нийлж, учраа олсон хэмээн мэдээлэл хийхэд Д.Ганбат гишүүн ганган хар шилтэй, том ширээний голд заларч, С.Эрдэнэ, Л.Гантөмөр хоёрын урд хойно бултагнаж байгаад л камерт өртсөн. Ямар ч байсан АН-ын хэвлэлийн хурал, УИХ-ын чуулганы үеэр Д.Ганбатыг ямар нэгэн байдлаар хэвлэлээр баараггүй хардаг болсон. Харамсалтай нь, ингэж “алиаллаа” гээд түүнийг Х.Баттулгагүй бол хэн ч биш гэдгийг Баянхонгорчууд 2024 оны сонгуулиар батлаад өгөх биз.
