Пүрэв гарагт Унгар улсын Гадаад хэргийн сайд Петер Сийяртогийн мэдэгдсэнээр Унгар болон Серби улс энэ оны зургаадугаар сард Дружба газрын тосны Унгар улс хүртэл татсан шугамыг Серби улс руу салаалуулах гэрээг үзэглэхээр төлөвлөж байна гэжээ.
Төлөвлөгөө ёсоор бол тэд Унгарын Алгио тосгоноос Сербийн Нови Сад хот хүртэл газрын тосны шугам татах юм. Тооцооллын дагуу Алгио-Нови Сад хоорондох газрын тосны шугам нь 128 километрийн урттай байх бөгөөд нийт 100 сая еврогийн өртгөөр 18-24 сарын хугацаанд баригдах ажээ.
Сайдын хэлснээр, “Одоогийн байдлаар Унгарын газрын тос, байгалийн хийн МОЛ компани болон Сербийн Транснефть компанийн зүгээс энэхүү төслийн хүрээнд хэлэлцээрээ үргэлжлүүлж байгаа. Хэрэв хэлэлцээр амжилттай болбол гэрээг ирэх зургаадугаар сард зохион байгуулагдах Серби-Унгарын дээд хэмжээний уулзалтын үеэр үзэглэж магадгүй” гэсэн байна.
Европын Холбооноос Оросын газрын тосны нийлүүлэлт, борлуулалтад хориг тавьсан ч Дружба газрын тосны шугамыг хоригийн арга хэмжээнд хамруулалгүй үлдээсэн юм.
Эх сурвалж: ТАСС
