Кремлийн хэвлэлийн төлөөлөгч Дмитрий Песковын хүү 33 настай Николай Песков “Комсомольская правда” сонинд өгсөн ярилцлагадаа Украины дайнд өөрийн сайн дураар оролцсон тухайгаа өгүүлжээ.
Түүний энэ ярицлагаас Николай Песков "Вагнер"-ийн үүсгэн байгуулагч Евгений Пригожины хувийн цэргийн компанид алба хааж байсан тухай саяхны мэдээлэл батлагдсан байна. Николай Песков "Вагнер"-т их буучаар алба хааж байсан бөгөөд түүнийг "хуурамч бичиг баримтын дагуу нэр, овог нэрийг нь өөрчилж" ажилд авсан гэж Пригожин хэлжээ.
Николай Песков дээрх сонинд өгсөн ярилцлагадаа овог нэрээ хэсэгчлэн өөрчлөх шаардлагатай болсон гэдгээ мөн дурджээ. Тэрээр энэхүү овог нэр нь дахиад хэрэг болж магадгүй гэдгийг дурдаад дэлгэрэнгүй мэдээлэл өгөхөөс татгалзав.
Ингэж тулааны талбар руу явах шийдвэр гаргах болсон шалтгаанынхаа талаар тэрбээр “Би үүнийг өөрийн үүрэг гэж үзсэн. Би зүгээр л оролцох ёстой байсан, тэнд байсан бүх хүмүүст туслах ёстой байсан. Би дэргэдэх найзууд болон бусад хүмүүс тийшээ явж байгааг зүгээр хараад сууж чадахгүй байсан" гэжээ
Аав нь түүнийг дэмжиж, "Вагнер" хувийн цэргийн компанитай холбоо тогтооход тусалсан гэж Николай Песков хэлэв. Тэр яг хаана байсан бэ гэсэн асуултад хариулахаас татгалзав. "Гэхдээ бид байнга ажилладаг, байнга аялдаг байсан. Зав чөлөөгүй байсан” гэж тэр хэллээ.
Николай Песков зургаан сар орчим цэргийн тусгай ажиллагааны бүсэд байжээ. Тэрээр шинэ оны дараа "Эр зоригийн төлөө" медалиар шагнуулснаа дурдаж, “Манай бүх багийнхан амжилттай тулалдсан. Илүү ихийг хэлж чадахгүй” гэжээ.
Николай Песков 1990 онд Москвад төрсөн бөгөөд ЗСБНХУ задран унасны дараа ээжийнхээ хамт Их Британи руу нүүж, тэнд 10 жил амьдарсан гэж Оросын хэвлэлд бичжээ. Тэрээр хойд эцгийнхээ Чолз овгийг хааяа бас хэрэглэдэг аж.
2017 онд Авлигатай тэмцэх сан Дмитрий Песковын хүүгийн талаар мөрдөн байцаалтын тайланг нийтэлсэн бөгөөд үүнээс үзэхэд тэрээр хаана ч ажилладаггүй хэрнээ тансаг машин, хувийн онгоц ашигладаг байжээ. Түүнчлэн Николай Песков (тухайн үед Чолз овогтой) хоёр хулгай хийсэн хэргээр Британийн шоронд нэг жил орчим хоригдсон гэж мэдэгджээ.
Эх сурвалж: ВВС болон rus.osodi.org
