Ерөнхий сайд Л.Оюун-Эрдэнэ Улаанбаатар хотын замын түгжрэлийг бууруулах чиглэлд заруулсан 420 тэрбум төгрөгөөр ямар ажлууд хийсэн талаараа парламентад танилцуулсан. Энэхүү мэдээлэлтэй холбогдуулан УИХ дахь Ардчилсан намын бүлэг өчигдөр байр сууриа илэрхийлж Засгийн газар болон Нийслэлийн удирдлагуудыг хариуцлагагүй, үр дүнгүй ажилласан гэж мэдэгдлээ.
Тухайлбал, гал унтраах байдлаар зам өргөтгөөд, автобус шинэчлээд, захиргааны арга хэмжээ аваад түгжрэл буурахгүй. Оношоо зөв олж, суурь шалтгаан нөхцлийг өөрчлөх шийдлүүд гарах ёстой. Монгол улсын хүн ам зүйн нутагшил, суурьшлын бодлого, татварын тэр тусмаа онцгой, импорт, гаалийн татварын бодлого, хотжилт, соёлын өөрчлөлт, төлбөрийн системүүдийн шийдэл зэргээс хамаарах асуудлыг цогцоор харж байж шийдэл гарна.
Хатуу дэд бүтцийн дутагдлаас болж түгжрэл ихэсч байгаа мэтээр сурталдаж, эрх баригчид төсөв нэмэхийг цаг ямагт нэхдэг. 10-20 сая хүн амтай мега хотууд хотжих процесс, түгжрэх аюул аль алиныг зөв бодлого барьж даваад гарсан. Ялгаатай нь тэдний түгжрэл бол “хөгжлийн түгжрэл” харин бидний түгжрэл “хоцрогдлын” түгжрэл юм.
Эрх баригчид Замын цагдаагийн газрын ганцхан гүүрийг 46 сая доллар барьсан. Өмнөх засгийн үед яг ийм дүнтэй мөнгөөр төмөр замын 11 нүхэн гарц гаргахаар төлөвлөж байсан юм. Тэг зогсож, таг гацсан хотын замд автомашиныг хурдлах олон цогц шийдлийг гарган хэрэгжүүлж, ганцхан жилийн дотор 50 тэрбум төгрөгөөр 18 уулзварыг өөрчлөн сайжруулж байсан. Түгжрэлийн эсрэг бодитой, үр дүнтэй үзүүлж болохуйц ганц ажил нь гагц тэр цаг үед гарч байсныг дахин нэг сануулья.
Түгжрэлийн хороо, түгжрэлийн сайд гэх мэтээр албан тушаал нэмэгдэж, улс, нийслэлийн төсвөөс жил бүр хагас их наядын мөнгө зарлагадан наргиж буй ч ахиц гардаггүй, асуудал нь улам бүр хуримтлагдан буй нөхцөл байдалдаа эрх баригчид дүгнэлт хийх ёстой гэсэн юм.
