АНУ Украинд 325 сая долларын цэргийн шинэ тусламж үзүүлэхээ пүрэв гарагт зарласан бөгөөд үүнд HIMARS их бууны сум болон пуужин нэмж оруулахаар төлөвлөж байна.
Багцад танк эсэргүүцэгч TOW залуурт пуужин, танк болон мина тэрчлэн дайсны хуягт техник эсэргүүцэх бусад хэрэгслийг багтаах ажээ.
Энэ долоо хоногийн сүүлээр АНУ-ын Батлан хамгаалахын сайд Ллойд Остин, нэгдсэн штабын дарга генерал Марк Милли нар Германд очиж, 50 орчим улсыг багтааж буй Украины холбоо барих бүлэгтэй уулзахаар төлөвлөж байна. Энэ үеэрээ тэд Украины хийхээр төлөвлөж буй сөрөг довтолгооноос өмнө Киевт үзүүлэх тусламжийн талаар хэлэлцээх юм. .
Маргааш буюу баасан гарагт Рамштайн нисэх хүчний баазад болох энэ уулзалтын үеэр Украины агаарын довтолгооноос хамгаалах систем, хуягт машин, их бууны хэрэгцээг хэлэлцэх төлөвтэй байна.
Мэргэжилтнүүдийн үзэж байгаагаар, Украиныг зэвсэг, сумаар хангах холбоо барих бүлгийн хүчин чармайлт хүлээлтээс давсан нь Оросын түрэмгийллийн эсрэг Украиныг дэмжихээр барууныхан шийдэмгий байгааг харуулж байна.
Гэсэн хэдий ч Украины зэвсэгт хүчин байлдааны талбарт зэвсэг, сумаар дутмаг хэвээр байгаа бөгөөд задруулсан мэдээллээр, Киев тавдугаар сар гэхэд агаарын довтолгооноос хамгаалах пуужингийн нөөцөө дуусч магадгүй гэж АНУ-ын арми болгоомжилж байгаа бөгөөд энэ тохиолдолд Украины агаарын цохилтод эмзэг байдал улам бүр нэмэгдэх юм.
Эх сурвалж: ВВС
