Сүүлийн үед шүүгчийн ачаалал болон шүүхийн байрын асуудлыг хөндөж байна. Тодруулбал, шүүхийн тулгамдсан асуудлыг олон нийтэд таниулах зорилгоор цуврал постеруудыг ШЕЗ-өөс гаргаж байгаа. Тэгвэл эдгээр постертэй холбоотой санал гомдлууд их гарах болжээ. Тодруулбал, шүүгч нар ачаалал ихтэй ажилласнаас болж хэргээ сайн уншиж, шүүн таслах ажиллагаа явуулахад хүндрэл бэрхшээл учирч байна. Мөн шүүхийн байрны хүрэлцээгүйгээс болж шүүгч нарын ачааллаас болж хэрэг маргаан шийдвэрлэхэд удааширч байна гэсэн мэдээлэл гарсан.
Тэгвэл Шүүхээс гаргасан постерынхоо талаар ШЕЗ-ийн албаны эх сурвалж тайлбар хийжээ. Тэрбээр "Шүүхийг хүнд сурталтай харагдуулдаг хамгийн гол зүйл нь энэ. Яг үнэндээ шүүх танхимын хүрэлцээгүй байдлаас шалтгаал, танхим сулрахыг хүлээж товлогдохгүй удааширч байгаа. Энэ бүхний ард эрх ашиг нь зөрчигдсөн иргэд шүүхээс үйлчилгээ авахаар хүлээж байдаг.
Хүмүүс бас энэ постерийг шүүмжилж байсан. Шүүгч өдөрт 4-5 цаг л унтдаг гэж үү гээд. Бодит байдал ийм байгааг бид өөрсдөө шүүх дээр очиж нүдээрээ харж судалсан. Шүүгчид ажлын 5 өдөрт шүүн таслах чиг үүргээ хэрэгжүүлдэг, шийдвэрээ бичдэг. Амралтын хоёр өдөрт бүтэн суугаад хэргээ уншдаг. Тэгээд ажилласан цагийг нь ажлын өдрүүдэд хуваахаар нэг шүүгч өдөр 19 цаг ажиллаж байгаа. Энэ бүхнийг яагаад гаргаад байна гэхээр шүүгчид ажлаа дийлэхгүй ялархсандаа биш. Шүүн таслах ажлын хэт ачааллын ард ч бас хэргээ шийдүүлэхийг хүлээж байгаа иргэд хохирч байдаг учраас гаргаж байгаа юм. Ард нь хүний эрх, эрх чөлөө давхар яригддаг учраас л шүүгчийн хэт ачааллаас шалтгаалж, хүний эрх хохирох ёсгүй юм гэдэг өнцгөөс асуудлыг тавьж байгаа" гэв.
