Улстөрийн нэрт зүтгэлтэн С.Зориг агсны төрсөн өдөр өнөөдөр тохиож байна. Ардчилсан намынхан түүний хөшөөнд цэцэг өргөх үеэр АН-ын дарга асан С.Эрдэнэ, АН-ын шинээр сонгогдсон дарга Л.Гантөмөрийг хүлээн зөвшөөрснөө илэрхийлэв.
АН-ын дарга асан С.Эрдэнэ “Ардчилсан намын үнэт зүйл, үзэл санааны эхлэл болсон үндэсний лидерүүдийн маань нэг С.Зориг агсны төрсөн өдөр тохиож байна. Энэ хүндэт хүнд бид хүндэтгэл үзүүлж байна. Бид Ардчилсан намын дотоодод үүсээд байсан зарим нэг үл ойлголцлын асуудалд цэг тавьж, өнөөдөр Ардчилсан нам нэгдмэл нэг удирдлага, нэг зорилготойгоор цаашид улс эх орны өмнө тулгамдаад байгаа нийгэм, эдийн засгийн олон чухал асуудлыг шийдэх ажилд ханцуй шамлан нэгдэж орох үйл явцаа эхлүүлж байна. Монгол Улсад ардчилал, шударга ёс нийгмийн сайн сайхны төлөөх үйл хэргийг манлайлах хүндтэй, хариуцлагатай үүргийг хүлээж байгаа АН-ын шинээр сонгогдсон дарга Л.Гантөмөртөө ажилд нь амжилт сайн сайхан бүхнийг хүсье. Гантөмөр даргадаа итгэж байгаагаа илэрхийлье. Монгол орон даяар биднийг харж байгаа ардчиллыг дэмждэг мянга мянган иргэндээ энэ өдрийн мэнд хүргэе” гэв.
АН-ын дарга Л.Гантөмөр “ Өнөөдөр С.Зориг агсан маань нас хүрэх байлаа. Түүний мөрөөдөж байсан нийгмийг бүтээж, үйл хэргийг гүйцэлдүүлэх нь ардчиллын залуучууд, АН-ынхны, эрх чөлөөний тэмцэж байгаа бүх хүний ариун үүрэг байдаг. Харамсалтай нь, өнөөдөр Монгол Улсад нэг намын хэт дарангуйлал давамгайлсан, нэг намын ноёрхол тогтсон, хүмүүсийн үг хэлэх эрх чөлөөг хааж боогдуулсан, хувийн өмч рүү халдаж довтолсон, хүмүүсийн амьдрал өдрөөс өдөрт уруудан доройтсон нөхцөл байдалтай нүүр тулчихаад байна. Өнөөдөр С.Зориг агсныхаа төрсөн өдрөөр бид хоорондоо “ Монголоо хөгжүүлье, залуусынхаа эрх чөлөөний төлөөх тэмцлийг идэвхжүүлье” гэсэн тангараг тавьж байна. Бидэнд алдах цаг хугацаа, зүгээр суух хором ч алга. Тиймээс ардчиллын үйл хэргийг үргэлжлүүлж, Монгол орноо хөгжүүлье гээд АН-ын бүх хүчнүүд нэгдэж Монгол орны төлөө ажиллана.
-Бид талийгаачийг бид сэтгэл зүрхэндээ үргэлж дурсдаг. С.Зориг агсан бидний хамгийн эхний эрх ашиг бол Монгол Улс. Хоёрт, улстөрийн эрх ашиг, гуравт, бүлэг фракц гэж хэлсэн байдаг. Улстөрийн эрх ашгийн үүднээс Монголын эрх ашгийг уландаа гишгэсэн улстөржсөн шийдвэрийг өнөөдрийг хүртэл байнга гаргасан байсан. С.Зоригийн амийг бүрэлгэсэн хэргийг илрүүлэх боломж монголчуудад байсан. Харамсалтай нь, улстөрд ашигласан. Ашиглах бүртээ энэ хэргийг АН рүү чихэж, гүтгэж байсанд харамсаж байна. Энэ хэргээр далимдуулж, улстөр хийж байгаа Ардчиллын хар толбо нь юм. Бид хууль хүчний байгууллага, шүүхийн байгууллагад итгэж ажиллах ёстой. Энэ хэргийг илрүүлэх шаардлагыг байнга тавих болно” хэмээн байр сууриа илэрхийллээ.
