Ерөнхийлөгч асан Н.Багабандийг Оюутолгойн ТУЗ-ийн гишүүнээс чөлөөлөх шийдвэрийг Засгийн газраас гаргасан. Харин өчигдрийн Засгийн газрын хуралдаанаар түүний оронд Ж.Тана гэгч эмэгтэй томилжээ. Өөрөөр хэлбэл, Монголчуудыг энэ эмэгтэй дэлхийд төлөөлнө гэсэн үг юм.
Ингээд өчигдрийн Засгийн газрын хуралдааны дараагаар Ж.Танаас хэвлэлийнхэн байр суурийг нь авчээ. Тэрбээр "Засгийн газрын урилгаар томилогдож байгаадаа маш их баяртай байна. Монгол иргэдийнхээ төлөө маш хариуцлагатай ажиллана гэдэгтээ итгэлтэй байна. Хариуцлагаа ухамсарлана. Миний хувьд өмнө Оюутолгойд ажиллаж байсан туршлагатай. Зөвлөх үйлчилгээний компанид уул уурхай байгалийн баялагийн чиглэлээр удирдан ажиллаж байсан туршлагатай хүн" гэлээ.
-Монголчуудын хамгийн их хүсэж байгаа зүйл бол Оюутолгойн ногдол ашгийг хэзээ наашлуулах вэ гэдэг дээр тэрбээр "Нарийн асуудлуудыг ажилдаа орж байгаад нухацтай харж байгаад ярилцмаар байна" гэсэн тайлбарыг өгчээ.
Тэгвэл Н.Багабандийн оронд ирж байгаа Ж.Тана гэж хэн бэ?
ЖАМБАЛДОРЖИЙН ТАНА
1989 онд төрсөн.
Боловсрол:
- 2007 онд АНУ-ын Юта мужчин Васач Академи бүрэн дунд сургуулийг дүүргэсэн.
- 2011 онд Харвардын их сургуулийг эдийн засагч, Зүүн Ази судлалаар баклаварын зэрэгтэй төгссөн анхны монгол оюутан.
- 2016 онд Дэлхийн Эдийн засгийн форумын дэргэдэх "Глобал Шэйпэрс" нийгэмлэгийн нэрэмжит тэтгэлэг хүртэж, Оксфордын их сургуульд бизнесийн удирдлагын магистрийн зэрэг хамгаалсан.
- 2012-2013 онд Куинсландын их сургуульд "Байгалийн баялаг, байгаль орчны чиглэлээр диплом хамгаалсан.
Ажлын түүх:
- 2011-2012 онд Дэлхийн уул уурхайн могулуудын нэг Рио Тинтогийн Австраль дахь компаниад Технологи, инновацийн хэлтэст бизнесийн шинжээч
- 2012-2013. Онд "Нортпаркс" зэсийн гүний уурхайд бизнесийн шинжээч
- 2013-2015 онд Оюу Толгой компанийн Нэгдсэн төлөвлөлт болон үйл ажиллагааны төслийн дунд болон урт хугацааны төлөвлөлтийн шинжээчээр тус тус ажиллаж байсан. Энэ хугацаандаа хамгийн үр дүнтэй гэж үздэг төсөл нь уурхайн төслийн талбай дахь нийт ажилчдын ажлын хуваарийг 28 хоног ажиллаж 14 хоног амардаг байсныг 14/7 болгох төслийг зоригтой санаачлан хэрэгжүүлж байжээ.
