Хэрэв ОХУ тус улсын энгийн иргэд рүү томоохон хэмжээний халдлага үйлдсэн тохиолдолд Украинд зэвсэг нийлүүлэх талаар байр сууриа эргэн харж магадгүй гэж Өмнөд Солонгосын ерөнхийлөгч Юн Сок Ёол мэдэгдэв.
Одоогийн байдлаар Өмнөд Солонгос Украинд хүмүүнлэгийн тусламж үзүүлж, дуулга, сум нэвтэрдэггүй хантааз зэрэг цэргийн хэрэгсэл нийлүүлж байгаа ч Украин руу зэвсэг шилжүүлэхээс татгалзаж байгаа юм.
Эдүгээ 53 настай Ерөнхийлөгч Юн Сок Ёол АНУ-д хийх айлчлалынхаа өмнө "Ройтерс" агентлагт өгсөн ярилцлагадаа Өмнөд Солонгосын засгийн газар 1950 оны Солонгосын дайны үеэр олон улсын хамтын нийгэмлэг тус улсад хэрхэн тусалж байсантай адил Украиныг хамгаалж, сэргээн босгоход туслах арга замууд дээр ажиллаж байгаа гэж мэдэгджээ.
"Ройтерс" агентлагийн мэдээлснээр, Өмнөд Солонгосын удирдагч Украинд зэвсэг нийлүүлэх боломжийн талаар анх удаа ярьж байгаа нь энэ юм.
Өмнөд Солонгос бол их бууны сум үйлдвэрлэлээрээ дэлхийд тэргүүлэгч орны нэг гэдгээрээ алдартай. Гэхдээ өнөөг хүртэл барууны холбоотнуудаас Украинд зэвсгийн тусламж үзүүлэхийг уриалж байгаа хэдий ч Сөүл Өмнөд Солонгосын олон компани ОХУ-д үйл ажиллагаа явуулдаг, түүнчлэн Хойд Солонгос дахь Москвагийн нөлөө зэргээс шалтгаалан Украинд зэвсэг нийлүүлэхээс зайлсхийсээр байгаа юм.
Өмнөд Солонгосын Ерөнхийлөгч Юн Сок Ёол "Хууль бусаар халдлагад өртсөн улс орныг батлан хамгаалах, сэргээн босгоход үзүүлэх тусламжийн хэмжээг олон улсын болон дотоодын хууль тогтоомжоор хязгаарлах ёсгүй гэж би үзэж байна. Гэсэн хэдий ч дайнд оролцож буй талуудтай харилцах харилцаа, тулааны талбар дахь үйл явдлын явцыг харгалзан бид хамгийн тохиромжтой арга хэмжээг авах болно" гэжээ.
Өмнөд Солонгосын "DongA Ilbo" сонин хэдхэн хоногийн өмнө Өмнөд Солонгос өнгөрсөн сард АНУ-д 155 мм-ийн 500,000 сум нийлүүлэх тохиролцоонд хүрсэн нь Вашингтонд Украинд сум нийлүүлэх уян хатан байдлыг бий болгож магадгүй гэж мэдээлсэн юм.
Өмнөд Солонгосын ГХЯ-ны тэргүүн энэ нийтлэлд тайлбар хийхдээ энэ мэдээллийг батлах боломжгүй гэж мэдэгдсэн ч Украинд зэвсгийн тусламж үзүүлэхийн эсрэг засгийн газрын байр суурь өөрчлөгдөөгүй хэвээр байна гэж нэмж хэлжээ.
Нэмж дурдахад, 3-р сарын эхээр Солонгост үйлдвэрлэсэн явах эд анги дээр суурилуулсан "Krab" өөрөө явагч гаубицуудыг Украин руу шилжүүлэхийг Сөүл зөвшөөрсөн нь мэдэгдэв. Энэ нь Сөүл Украинд Өмнөд Солонгосын бүрэлдэхүүн хэсгүүдтэй зэвсэг нийлүүлэх талаар албан ёсоор тохиролцсон гэсэн үг юм.
Эх сурвалж: ВВС
