Санжаасүрэнгийн Зориг агсны амь насыг хөнөөсөн гэх хэрэгт буруутгагдаж, гурван шатны шүүхээс ялын дээд хэмжээ сонсож байсан Б.Содномдаржаа, Т.Чимгээ нарыг гэм буруугүй гэж үзэн, хэргийг нь хэрэгсэхгүй болгосныг Хууль зүй дотоод хэргийн сайд Х.Нямбаатар өчигдөр албан ёсоор хэвлэлийнхэнд мэдэгдлээ. Сэтгүүлчид уг хэрэг явдал юу болж буй талаар энэ сарын 13-ны өдөр түүнээс тодруулахад, мөрдөх байгууллага санал дүгнэлтээ боловсруулаад прокурорт шилжүүлэх шатандаа явж байгаа гэж байсан юм.
Тэгвэл түүний өчигдөр өгсөн мэдээллээр, Нийслэлийн прокурорын газраас мөрдөгчийн ирүүлсэн саналыг үндэслэж, Б.Содномдаржаа, Т.Чимгээ, Ц.Амгаланбаатар нарт холбогдуулан 830142 дугаартай эрүүгийн хэрэг дээр яллагдагчаар татсан тогтоолыг хүчингүй болгож, шийдвэрлэжээ. Тодотгоход, Б.Содномдаржаа нарт холбогдох хэргийг хэрэгсэхгүй болгох саналыг цагдаагийн байгууллагаас прокурорт таван удаа гаргасан бөгөөд хэрэгсэхгүй болгох тухай шийдвэрийг өчигдөр гаргажээ.
Х.Нямбаатар сайдын хэлж ярьж буйгаас үзэхэд, 1998 онд үйлдэгдсэн С.Зоригийн гэх хэргийн шинэ замнал эхэлж буй бололтой. Учир нь С.Зориг агсны амийг хөнөөсөн хэргийг шалгах Ажлын хэсэг шинээр байгуулагджээ.
Иргэд, олон нийт, хэвлэлийнхний хувьд асуудлыг хууль хяналтын байгууллагынхан шиг мөрдөж, мөшгөж чадахгүй ч гэлээ Б.Содномдаржаа нар үнэхээр огт гэм буруугүй хүмүүс байсан уу, өнгөрсөн хугацаанд яг юу болоод өнгөрөв өө, энэ бүхний ард улс төрийн ямар тоглолтууд тавигдсан бэ гэхчлэн хардлага дагуулсан асуултуудтай үлдэж буй нь нууц биш.
Ерөөс С.Зориг амиа алдсанаас хойш Монголын улс төрд энэ хэргээр ашиг хонжоо хайсан, тоглолт хийсэн үйл явцууд цөөнгүй өрнөсөн болохоор арга ч үгүй биз. Хэд хэчнээн ч хүнийг гэм буруутай гэж үзэж, цагдан хорьж, эрүүдэн шүүсэн юм бэ. Эгнэж жагсаагаад харвал урт дараалал гарахаар л мэдээллүүд өнгөрсөн олон жилүүдэд хөвөрсөн. Тиймээс Б.Содномдаржаа нар гэм буруугүй байгаад шат шатны шүүхээс ялын дээд хэмжээ сонсоод, орон шоронд үхлээ хүлээсэн шиг үйл явцууд дахиад өөр бусад хүмүүс дээр давтагдах вий гэх сэрэмж дагаад үүсэж байна, нийгэмд. Б.Содномдаржаа нарыг цагаатгаж буй прокурорын шийдвэр сонгуулийн өмнөх жил гарч байгаа нь ч анхаарал татаж буй билээ.
Тэгэхээр нийгэмд үүсээд буй айдас гэх юм уу, тодорхой бус байдлыг арилгахын тулд хууль хяналтынхан улс төрөөс хараат бусаар ажиллаж чадах уу, хоёр арваны өмнө үйлдэгдсэн гэмт хэргийг үйлдэгчийг илрүүлэх бодит боломж үнэхээр байгаа юу гэдэг нь гол асуудал юм.
Б.МӨНХ