80 хүн, дөрвөн хуулийн этгээдэд холбогдох Хөгжлийн Банкны гэх эрүүгийн хэргийн анхны шүүх хурал гуравдугаар сарын 2-нд эхэлсэн ч хойшлогдсон билээ.
Улмаар дөрөвдүгээр сарын 17-ны даваа гарагт 08:30 цагаас Улаанбаатар чуулгын байранд эхлэхээр товлогдсон. Шүүх хурал хоёр өдөр үргэлжиллээ. Өнөөдөр гурав дахь өдрөө үргэлжилж байна.
Прокурорын байгууллагаас эрх мэдэл, албан тушаалын байдлаа урвуулан ашигласан гэх гэмт хэрэгт холбогдсон шүүгдэгч нарын яллах дүгнэлтийг танилцуулж байна.
Хөгжлийн банкны дэд захирлаар ажиллаж байсан Б.Чойжилжалбуу нь тус банкны гүйцэтгэх захирал Б.Батбаяр, Экспорт, импорт, худалдааны санхүүжилтийн газрын захирал Б.Амгалан, банкны мэргэжилтэн А.Хүчитбаатар нартай үйлдлээрээ санаатай нэгдэж, эрх мэдэл албан тушаалын байдлаа урвуулан ашигласан.
Тухайлбал, Хөгжлийн банкны тухай хууль, Хөгжлийн банкны эд хөрөнгө барьцаалах журам, зээлийн хорооны журмыг зөрчиж "Ганхүдэр орд" ХХК-ийн хорголжин төмрийн үйлдвэр барих төсөлд 5 тэрбум төгрөгтэй тэнцэх хэмжээний иений зээлийг жилийн 7 хувийн хүүтэй олгохыг дэмжжээ. Энэ үйлдэлдээ 80 сая төгрөгийн хахууль авсан байна.
