С.Зориг агсны амь насыг хөнөөсөн хэрэгт буруутгагдан 20 жилийн ял сонссон Т.Чимгээ, Б.Содномдаржаа, Ц.Амгаланбаатар нарын хэрэг хэрэгсэхгүй болж байна. Тэднийг 2017 оны наймдугаар сард яллаж 2021 оны тавдугаар сард батлан даалтад гаргаад байсан юм. Хэрэг нь хэрэгсэхгүй болж байгаа эдгээр хүмүүс хохирсон хохирлоо төрөөс нэхэмжлэх эрхтэй. Төр ч хохирлыг бүрэн барагдуулах хууль эрх зүйн орчин байгаа юм. Харин Т.Чимгээ, Б.Содномдаржаа нарыг хэлмэгдүүлэн шоронд хийсэн гэм буруутнуудыг олж тогтоох эрүүгийн хэрэг үүснэ гэж Хууль зүй дотоод хэргийн сайд Х.Нямбаатар хэллээ.
Энэ хэргийг хэрэгсэхгүй болгосноор С.Зориг агсныг хөнөөсөн хэргийг дахин шалгаж эхэлнэ. Энэ ажил Тагнуулын ерөнхий газарт байсан бол өнөөдрөөс Эрүүгийн цагдаагийн газрын албанд ирж байна. Энэ албаны дарга хурандаа Т.Сүхболдоор ахлуулсан ажлын хэсэг байгуулагджээ.
