Владимир Путин Украины хэсэгчлэн эзлэгдсэн хоёр бүс болох Херсон, Луганск мужид айлчилжээ. Тэрээр тус бүс нутагт байгаа зэвсэгт хүчнийхээ хоёр штабт очиж, генералуудтай фронтын нөхцөл байдлын талаар ярилцсан тухай ОХУ-ын Ерөнхийлөгчийн хэвлэлийн алба видео бичлэг нийтэлсэн байна.
Видео бичлэг дээр Путин Ми-8 нисдэг тэрэгнээс бууж, дараа нь жийпүүдийн цуваа Херсон мужийн эзлэгдсэн хэсгийн төв болоод буй Геническ рүү ирж байгаа нь дүрслэгджээ.
Путиныг тэнд "Днепр" бүлэглэлийн командлагч Олег Макаревич угтан авчээ.
Энэ аяллыг "урьдчилан бэлтгээгүй" гэж Кремлийн мэдэгдэлд дурджээ. Энэ айлчлалын үеэр Путин цэргийн албан хаагчдад Улаан өндөгний баярын мэнд хүргэж, иконы дүрсний хуулбарыг бэлэглэсэн байна.
Энэ нь Путин дайн эхэлснээс хойш Херсон, Луганск мужид хийж буй анхны айлчлал юм. Үүнээс өмнө 3-р сарын 19-нд мөн л нууцаар Мариупольд очиж байсан юм.
Эх сурвалж: ВВС
