Манхэттэн хотын Чайнатаун дахь Хятадын нууц "Цагдаагийн газар" ажиллуулж байсан хоёр эрэгтэйг Нью Йорк хотод баривчилжээ.
Нью-Йоркийн иргэн 61 настай Лу Жианван, 59 настай Чен Жинпин нарыг Хятадын төлөөлөгчөөр ажиллаж, шударга ёсыг тогтооход саад учруулсан хэрэгт буруутгаж байгаа юм.
Хятад улс өмнө нь ийм цагдаагийн газар байгааг үгүйсгэж, гадаадад байгаа иргэддээ үйлчлэх төв гэж нэрлэж байсан.
Гэвч баривчлагдсан хоёр этгээд Хятадын Олон нийтийн аюулгүй байдлын яамны захиалгаар хилийн чанад дахь анхны цагдаагийн хэлтсийг АНУ-д байгуулсан гэж АНУ-ын Хууль зүйн яам мэдэгдэв.
Бруклины Ерөнхий прокурор Бреон Пирс мэдэгдэлдээ “Энэ нь Хятадын засгийн газар Нью-Йорк хотын төвд нууц цагдаагийн газар байгуулж манай улсын тусгаар тогтнолыг бүдүүлгээр зөрчиж байгааг илчилж байна" гэжээ.
Ийм Хятадын нууц цагдаагийн газар дэлхий даяар дор хаяж 100 байгаа бөгөөд тухайлбал, Их Британи, Нидерланд зэрэг 53 улсад үйл ажиллагаа явуулдаг гэж үздэг. Гуравдугаар сард Канадын Холбооны цагдаагийн газар Монреал орчмын ийм хоёр салбарыг мөрдөн шалгахаа зарласан.
Ерөнхий прокурорын туслах Мэтью Олсен "Хятадын үйл ажиллагаа нь улс үндэстний хүлээн зөвшөөрөгдсөн хэм хэмжээнээс хол давсан. Бид манай улсад амьдарч буй бүх хүмүүсийн эрх чөлөөг дарангуйлал хэлмэгдүүлэлтийн аюулаас эрс хамгаалах болно" гэж мэдэгдэв.
Прокурорын мэдээлснээр Лу Жианван Хятадын хууль сахиулах байгууллагатай нягт холбоотой байсан бөгөөд 2015 оноос хойш АНУ-д Хятадын тэрс үзэлтнүүдийг хэлмэгдүүлэхэд Бээжингийн эрх баригчдад тусалж байжээ.
2022 оны аравдугаар сард Холбооны мөрдөх товчоо Лу Жианванг, Чен Жинпин нарыг сэжиглэн нэгжлэг хийж, байцаалт авчээ. Шалгалтын үеэр тэдний гар утсыг хураан авсан бөгөөд хоёулаа АНУ-д үйл ажиллагаагаа явуулж байсан Хятадын Олон нийтийн аюулгүй байдлын яамны ажилтантай харилцсан захидал мессэжээ устгаснаа хүлээн зөвшөөрсөн гэж прокурор мэдэгдэв.
Лу, Чен нарын гэм буруутай нь тогтоогдвол 25 жилийн хорих ялаар шийтгэх юм.
Хүний эрхийн байгууллагууд хилийн чанадад амьдарч буй Хятад иргэдийг хянаж, хавчиж байна гэж Бээжинг буруутгаж байна.
Эх сурвалж: ВВС
