Москва хотын шүүх сөрөг хүчний улс төрч, сэтгүүлч Владимир Кара-Мурзаг эх орноосоо урвасан, армийн талаар олон нийтэд худал мэдээлэл тараасан зэрэг үндэслэлээр чанга дэглэмтэй колонид 25 жил хорих ял оноолоо.
Тэрээр хорих ялыг чанга дэглэмтэй колонид эдлэх аж. Шүүхийн шийдвэрээр түүнд мөн 400,000 рублийн торгууль ногдуулжээ. Мөн сэтгүүлзүйн үйл ажиллагааг нь долоон жилээр хориглов. Шүүх хурлыг хаалттай явуулсан байна.
Сэжигтний өмгөөлөгч шүүгч Сергей Подопригоровыг шүүх хурлыг шударга явуулах боломжгүй гэж үзэж татгалзах саналыг хоёр ч удаа гаргасан.
Кара-Мурза шүүх хурал дээр улс төрийн үзэл бодлоосоо болж хавчигдаж байгаа бөгөөд юунд ч гэмшихгүй гэж мэдэгдэв.
Кара-Мурза эцсийн үгэндээ “Гэхдээ би энэ шүүхээс юу ч гуйхгүй. Би шийдвэрээ мэдэж байна. Одоо Орост үзэл бодлынхоо төлөө дуугарсаны үнэ цэнэ нь ийм байна "гэж тэр хэлэв.
Владимир Кара-Мурза 2022 оны дөрөвдүгээр сараас хойш шоронд байгаа юм. Анх түүнийг "Худал мэдээлэл олон нийтэд санаатайгаар тараасан" гэж буруутгаж байсан. Дараа нь түүний эсрэг дахин хоёр хэрэг нээж, аравдугаар сард нэг хэрэг үүсгэсэн.
Владимир Кара-Мурзагийн хэрэг бол эх орноосоо урвасан гэх зүйлийн шинэчилсэн найруулга Орост хэрэгжиж байгаа анхны тохиолдол юм. Шинэчилсэн заалтаар бол нууц мэдээлэл дамжуулахаас гадна Оросын аюулгүй байдлын эсрэг чиглэсэн үйл ажиллагаанд бусад улс орон, байгууллагад тусламж үзүүлсэн бол эх орноосоо урвасан гэж үздэг болсон.
Владимир Кара-Мурза бол телевизийн сэтгүүлч, найруулагч, нийтлэлч юм. Борис Немцовын эрх чөлөөний сангийн тэргүүн асан. 2015-2016 онд Ардын эрх чөлөөний намын дэд даргаар ажиллаж, 2019 оны есдүгээр сараас 2022 оны хоёрдугаар сар хүртэл “Эхо Москвы” болон “Эрх чөлөө” радиогийн “Долоо хоногийн тойм” нэвтрүүлгийг хөтөлсөн.
Тэр бас "Эв санааны нэгдэл" ардчилсан хөдөлгөөн, Оросын сөрөг хүчний зохицуулах зөвлөлийн гишүүн байсан юм.
Эх сурвалж: centralasiamedia.
