УИХ-ын чуулганы өнөөдөр /2023.04.14/-ийн хуралдаан эхэллээ.
Энэ үеэр УИХ-ын гишүүн Б.Пүрэвдорж хүүхдийн мөнгийг хүүхэд бүрд олгох хэрэгтэй бөгөөд ялгаварлан гадуурхаж болохгүй гэдгийг дурдав. Мөн сайдын албан тушаалаа аваад удаагүй Х.Булгантуяа гишүүнийг хүүхдийн мөнгөнөөс хасагдсан танилуудаа "арын хаалгаар" оруулж байгаа гэдгийг хэлсэн юм.
Тэрбээр "Иргэд дараа жил болох сонгуулийн хуулиас илүүтэй хүүхэд хөгшдийн тэтгэврийн талаар шаардлага тавих хэрэгтэйг сануулж байна. Хүүхдийн мөнгийг ялгавартай олгодог болсноор аймаг, дүүргийн Хөдөлмөр, нийгмийн халамжийн газраар дүүрэн өргөдөл байна. Яаманд ч ялгаа алга.
Үүнийг Х.Булгантуяа өөрийнх нь тойргийн хүн тул хүүхдийн мөнгийг нь өгөхийг тушаадаг. Ерөнхий сайд, генсекийн нутгийн хүн ирсэн тул түүний хүүхдийн мөнгийг өгөөрэй гэх мэтээр уг асуудлыг шийдэж байна. Хөдөлмөр, нийгмийн халамжийн газар, яамдуудад очсон хүсэлтүүдийг ийн шийдвэрлэж байна. Хөөцөлдсөн нь мөнгөө авч, хөөцөлдөөгүй нь мөнгөгүй хоцрох хэрэг үү. Ийм байж болохгүй. Тиймээс хүүхэд бүрд хүүхдийн мөнгийг өгөх асуудлыг Засгийн газар яаралтай шийдэж, УИХ-аар оруулах ёстой" гэсэн юм.
Үргэлжлүүлэн тэрбээр "П.Анужин гишүүн орон нутгаар уулзалт хийж явж байна. Багц хуулийн ажлын хэсгээ яаралтай ажилд оруул. Шинэ сайдыгаа дуудаж, яаралтай ажлыг нь хийлгэ. Т.Аюурсайхан гишүүний оруулж ирсэн олон асуудлыг цэгцэлж, шийд гэж шахаж, шаард" хэмээлээ.