ШШГЕГ-ын дарга асан Д.Загджавыг ажлын хариуцлага алдсан хэмээн Засгийн газрын шийдвэрээр өнгөрсөн оны намар ажлаас нь чөлөөлсөн.
Тэгвэл авлига, албан тушаалын хэл аманд ихээхэн холбогдож, үе үеийн хамаг сайд дарга нарын албан тушаалыг сэлгэн тухласан өдгөө 60 гарч яваа Д.Загджавыг МАН-ын удирдлагууд Элчин сайд болгох тохироог хийсэн гэх яриа Тусгаар тогтнолын ордон дотор өрнөж байна. Тэр дундаа түүнийг ОХУ юм уу БНСУ руу Элчин сайдаар томилж магадгүй гэх албан бус яриа намынхны дунд тархжээ.
Д.Загджавын гэр бүлд Монголын төр үеийн үед өртэй мэт үйлчилсээр ирсэн гэж хэлж болно. Түүний эхнэр Н.Уранчимэг нь хотын гаальд 15 жил тасралтгүй хяналт шалгалтын даргаар ажиллаж, мөн л 59 настай ч тэтгэвэртээ гардаггүй төрөөс цалин авч, даргын сэнтийг 15 жил бөглөж буй.
Д.Загджавын хүү З.Жавхлан төрийн албанд шигдэж, аавынхаа араас даргын суудлыг горилон босго элээж буй нэгэн гэж хамт ажиллаж байсан хүмүүс нь хэлэв. Чадвар дутмаг ч цалин авч, төрийн албан хаагч гэх нэр зүүдэг аж. Түүнийг аавынхаа нэр нөлөөгөөр төрийн байгууллага, байгууллага дамжин явдаг гэж ойр дотны намын нөхдүүд нь хэлж байв.
Тэгвэл “Бүх юмны дарга” насаараа хийсэн Д.Загджав хэр баян чинээлэг хүн бэ?!
Д.Загджавын хувьд “тэрбумтан” хэмээн тодотгосон нь учиртай. Д.Загджав АТГ-т өгсөн Хөрөнгө орлогын мэдүүлэгтээ “Хоёр байртай. Эдгээр нь 4 тэрбум 250 үнэлгээтэй. 460 сая төгрөгийн үнэлгээтэй Hummer H2, Lexus-470, Lexus LX-450, Lexus LX-460, Lexus 570, Infiniti FX35 маркийн зургаан авто машинтай. Үнэт эдлэл, урлаг түүхийн үнэт зүйл нь 118 сая төгрөгөөр үнэлэгддэг. 423 сая төгрөгийн хадгаламжтай” гэжээ. Энэ бол зөвхөн түүний наанаа мэдэгдэж болох хөрөнгө нь.
Түүнчлэн тэрээр Бага тэнгэрийн аманд зүрхний анд Ц.Анандбазартайгаа бөөрөө нийлүүлэн, хаяа дэрлэн үнэтэй хауст амьдардаг.
