Хөдөө аж ахуйг дэмжих санд Эрүүгийн цагдаагийн албанаас өчигдөр шалгалт орсон талаар бид мэдээлсэн. Тэгвэл Хүнс хөдөө аж ахуйн хөнгөн үйлдвэрийн яамны харьяа Хөдөө аж ахуйн сангаас сүүлийн жилүүдэд 15.000 иргэн, аж ахуйн нэгж нь өндөр дүнтэй зээл авч, эргэн төлөлт хийхгүйгээр 260 орчим тэрбум төгрөгийн өр үүсгэж, улсын төсвийн мөнгийг завшсан байна.
Уг сангийн эргэн төлөгдөөгүй зээлийн дийлэнх хувийг улс төр, бизнесийн салбарын нөлөө бүхий эрхмүүд, тэдний хамаарал бүхий хүмүүсийн компаниуд эзэлж байна. Тухайлбал,
УИХ-ын гишүүн Б.Пүрэвдорж, Нийслэлийн МАХН-ын дарга асан Э.Эрдэнэжамъян нарын улс төрчид, “Шунхлай холдинг” компанийн захирал П.Батсайхан, Тариаланчдын холбооны тэргүүн Л.Цандэлэг, урлагийн салбараас Камертон хамтлагийн дуучин Эба буюу Б.Эрдэнэбат нарын олны танил эрхмүүдийн хамааралтай компаниуд их хэмжээний зээл авсан талаар нэрс дурдагдаж байна.
Мөн Хөдөө аж ахуйн сангийн захирлаар ажиллаж байсан С.Нямсүрэн, Төв аймгийн Хөдөө аж ахуйн газрын дарга Н.Гантулга нарын удирдлагууд ажиллаж байгаа байгууллагынхаа хөрөнгийг тонон, дээрэмдсэн асуудлаар байцаашдаж байгаа аж.
Төрөөс олгодог зээл тусламж, хөнгөлөлт, сангийн хөрөнгийг танил тал, эрх мэдлээрээ талцаж цөлмөдөг явдал жишиг болон тогтжээ. Урьд нь Жижиг дунд үйлдвэрлэлийг дэмжих сан, одоо Хөгжлийн банкны хэдэн тэрбумын чанаргүй зээлийн асуудал хэзээ шийдэгдэх нь тодорхойгүй байхад, Тариалан эрхлэлтийг дэмжих сангийн мөн хэдэн зуун тэрбумаар тоологдох хохирол учруулсан асуудал ийнхүү ил болж байна.
