Энэ сарын 7-9-ний хооронд Сингапур улсад зохион байгуулагдсан Спорт өрөлтийн дэлхийн аварга шалгаруулах тэмцээнд 17 улсын 367 тамирчин 13 насны ангилалд өрсөлдлөө. Тэмцээн “Ганцаарчилсан”, “Хос”, “Багийн буухиа” болон “Гэр бүл” гэсэн үндсэн дөрвөн төрлөөс гадна улс бүрийн шилдэг эрэгтэй, эмэгтэй тамирчид болон багийн өрсөлдөөнүүд явагдаж тэмцээнийг маш сонирхолтой болгож чадлаа.
Энэ удаагийн тэмцээнд Монгол Улсаа төлөөлөн Улаанбаатар хот болон орон нутгаас шалгарсан шигшээ багийн 5-58 насны 39 тамирчин оюун ухаан, хурд, авхаалж самбаагаараа өрсөлдөж 27 медаль хүртлээ.Энэ гайхалтай амжилтын эзэд болсон нийт тамирчдадаа дахин баяр хүргэж дараа дараагийн тэмцээн уралдаанд нь өндөр амжилт хүсье!
Мөн тамирчдаа шаргуу бэлтгэсэн спорт өрөлтийн клубүүдийн удирдлага, багш нар, шигшээ багийн Ахлах дасгалжуулагч Э.Эрдэнэмандах болон тамирчдын маань үргэлж ар тал нь болж байдаг гэр бүлийнхэнд нь талархсанаа илэрхийлье.Ийнхүү Монгол Улсын шигшээ баг 2021 онд болсон дэлхийн аваргын тэмцээнээс 5 медаль хүртэж байсан бол энэ удаа медалийн хур буулгаж чадлаа.
Дашрамд дурдахад Монголын Спорт Өрөлтийн Холбоо нь Оюуны спортын менежмент байгууллагатай хамтран сар бүр “Улсын чансаа”-ны тэмцээнийг зохион байгуулж шилдэг тамирчдад лиг, улс болон олон улсын тэмцээн уралдаануудад оролцох боломжийг олгосоор байна.
Монголын Спорт Өрөлтийн Холбооны Ерөнхийлөгч Х.Хатанбаатар
