Өчигдөр Төв талбайд боловсролын салбарын багш ажилтнууд болон МҮЭХ, сургуулиудын үйлдвэрчний эвлэлийн холбоодын төлөөлөл багш шинжлэх ухааны салбарынхны цалинг нэмэхийг шаардаж жагслаа. Тэд төрийн өндөрлөгүүд болон Засгийн газарт, салбарын сайдад шаардлага хүргүүлэв. Шаардлагынхаа хариуг ирэх долоо хоногт авах юм байна. Хэрвээ нааштай хариу өгөхгүй бол тэд ажил хаялт зарлана гэдгээ мэдэгдсэн байгаа юм. Өчигдөр цуглаж жагссан багш нар бодит байдал, үнэнийг өгүүлж байна. Өнөөдрийн нийгэм ямар билээ, багш нарын ачаалал, авдаг цалин хэр байгаа билээ. Авдаг цалин нь амьдралд нь хүрэлцэхгүй, өр зээлээ төлөөд гар дээрээ ямар ч мөнгөгүй үлддэг. Ажлын байран дээрээ өрийн сүлжээ үүсгэдэг, хоол цайны газартаа өр тавьж өдрийн цайгаа уудаг гэх мэтчилэн зовлон тоочсон багш нар олон байв. Тэд бусад багшийгаа төлөөлж байгаа ч үнэндээ ЕБС-иудын багш нар тэр дундаа залуу багш нарт зовлон их байгаа. Дээр нь ажлын ачааллаас болж ажлаасаа халшрах хам шинжинд их өртөж байгаа талаар ярьсан. Тиймээс багшийн орон тооны хомсдол үүсчихсэн. Хэдий төрийн байгууллагад ажилладаг нэртэй ч “цалин нь оров халин одов” уриатай лоозон барьж зогссон тэд шударга үнэмлэмжийг нэхэв.
Гэтэл салбарын сайд Л.Энх-Амгалан нь олон нийтийн хэрэгслээр их сайхан зүйл ярина. Тэр нь бүгд худлаа амлалт хоосон яриа, биелэгдэшгүй мөрөөдөл гэдгийг захын нэг багш нотлоод хэлээд өгч байна. Багш нар хангалттай цалин авч чадахгүй байна. Дээрээс нь ажлын ачаалал, бичиг цаасны ажил ихтэйгээс болж хүүхдүүдтэйгээ тулж ажиллах боломж хомс. Стандартаараа бол нэг ангид 20-30 сурагч суух ёстой. Гэтэл өнөөдөр аль ч сургуулийн ангийн ачаалал хэрээс хэтэрч нэг багшид 50-60 сурагч оногдож байна. Ийм олон хүүхэдтэй ганц багш яаж ажиллах вэ. Тэгээд авдаг цалин нь гэж бага. Ийм байхад сургалтын чанар хариуцлага нэхээд байж болохгүй биздээ Салбарын сайдаа.
БШУ-ны сайд Л.Энх-Амгалан “ Хоёр саяас дээш цалинтай 7000 багш бий. Гэрээний үүргээ биелүүлж, багш нарын цалинг 30 хувиар нэмэгдүүлсэн. Багш нар сард 1.050.000-2.800.000 төгрөгт хүрсэн. Ур чадвар гүйцэтгэл дээр тулгуурлаж 10-25 хувийн урамшуулал олгодог. Харин 5-6 дугаар түвшинд үнэлэгдсэн бол урамшуулал олгодоггүй. Чадвартай байж өндөр цалин авах тэмүүлэлтэй байх ёстой” гэж худлаа ярьсан байсан.
Та Төрийн ордонд олон сэтгүүлч зураглаачийн өмнө их сайхан боломжтой мэтээр худлаа ярих юм. Үүний оронд гадаа жагссан багш нар дээр гарч ирээд бодит байдлыг нь тулгамдаж байгаа асуудлыг нь сонссон бол үнэнд нийцэх байсан. Та багш нарын цалин дабладана, багш нар зөвхөн хичээлээ заана, илүү цагийн мөнгөө авна, элдэв бичиг цаастай зууралдахгүй, багшийг хөгжүүлнэ, ар гэртээ гаргах цаг завыг нь нэмэгдүүлнэ гэж байнга ярьдаг. Гэтэл энэ яриа чинь хөрсөн дээрээ буухгүй байна, хэрэгжихгүй байна гэдгийг олон багш нар хэлж байна. Тэд хангалттай цалин авч, цаг нартай ажиллабал ядаж ар гэрийнхэндээ цаг зарцуулж, ажлаасаа шантрахгүй халшрахгүй хийх урам зоригтой болно биздээ. Тиймээс та худлаа попорч байхын оронд багш нараа сонс, багш нартайгаа уулз бодит байдлыг нь нүдээрээ хараад зөрүүтэй мэдээллийнхээ зөв бурууг шүүгээрэй гэж хэлье.
Эх сурвалж: Toim.mn
