Сошиал орчинд хүчтэй шүүмжлэгч Зохиолч, яруу найрагч Р.Эмүжин Орос, Украины дайныг тойрон хоёр хуваагдан талцаад байгаа иргэддээ өөрийн үзэл бодлыг илэрхийлжээ. Тэрбээр:
"За бүр яг ингээд хэлчихмээр л өдөр юм даа. Орос, Украины дайныг тойрон манайхан хоёр талцаж байгаад хоёр сар гаруй хэрэлдлээ. Монголчуудын хэрүүл Украины нутагт хором тутам амиа алдаж буй орос, украин цэргүүд, энгийн иргэдийн хувь тавиланг шийдчих юм шиг л үгийн мууг хэлэлцэж, үсдэлцэхээс наагуур шүүж байна. НАТО болон барууны талыг баримтлагчид, Орост онцгой хайртай ахан дүүс гэсэн үндсэн хоёр бүлэгт үүрээ эвдэхээс наагуур хуваагдлаа.
Одоо бүр Дэлхийн хоёрдугаар дайны ялалтын 77 жилийн ойг үгүйсгэн мушгиж, энэ өдрийг тэмдэглэх, үгүйг хүртэл шүүцгээж байна. Оросын талыг баримтлагчид ба Оросыг үзэн ядагчид гэсэн хоёр туйлд хоног хоногоор хуваагдаж, монголчууд хаана нь оршин тогтноод байгааг ч ойлгоход хэцүү боллоо. Үзэл суртлын том дайн цахим хэлбэрээр царайгаа нууж байгаад Монголд өрнөж байна даа. Ингэтлээ олон улсын явдлыг, геополитик, эдийн засгийн зөрчилдөөнийг шүүдэг мэргэжилтнүүд ийм богино хугацаанд төрж мэргэшээд байна уу, эсвэл үүний цаана өөр ашиг сонирхол, хөрөнгө мөнгө үйлчлээд байна уу?
Украинд барууны орнууд хэдэн зуун тэрбум ам.долларын зэр зэвсгээр тусалж, зээлж, Зеленскийн алдарт ногоон цамц 111 мянган ногооноор зарагдсан боловч украинчууд эх оронгүй, эх нутаггүй болж, дүрвэж, цагаачилж, метронд хоёр дахь сардаа амьдарч байгаа болохоос өөр бусад нь биш шүү дээ. Украинд зээлсэн сум бүрийн тоогоор, Орост авсан хориг болгоны сүүдэрт хүний амь үрэгдэж, хүүхдүүд өнчирч байгаа нь л бодит байдал. Халуун хөнжилдөө шургаж, халуун сэдвээр мэтгэлцсэн өдрүүд 2022.02.24-нөөс хойш дэлхий даяар үргэлжилж байгаа нь ч бас үнэн. Гэтэл бид яав? Сүүлдээ бүр Оросыг баримтлагчдад барууныхны виз гарахгүй гэхчлэн хамгийн хөгийн барьцаагаар хамгийн хогийн улстөржилтийг энүүхэн хонхортоо, тэрүүхэн тойрогтоо, тамын тогоондоо тарчлаан болгон үргэлжлүүлж байна. Үүгээр ч зогсохгүй, Дэлхийн хоёрдугаар дайны ялалт болоод ялагдлыг үгүйсгэж, том дуугарч, том шүлс үсэргэцгээж байна. Юу гээч? Үнэнийг үнэнээр арчдаггүй, өнгөрснийг одоогоор гутаадаггүй гээд хэлчихье. Өнгөрсөн зууны итгэл үнэмшил рүү өнөөгийн зууны төөрөгдөл ба төлөвшил, боловсрол ба бодлогоор нулимдаггүй. Түүх түүхээрээ үлдэж, түүхэн цаг үеийн амьд амьсгал хүн төрөлхтний зүрхэнд үүрд үлддэг юм. Өнөөдрийн Орос, Украины дайн ч бас хожмын өдөр хүн төрөлхтний түүхэнд алдаа ба оноотойгоо үлдэх болно, тэр түүхийн төгсгөлд харин Монгол хэрхсэнийг, Орос, НАТО-гийн дунд яаж гэнэдсэнийг сурах бичгээс сонсмооргүй, уншмааргүй байгаа шүү! Эцэст нь, Ялалтын баярын мэнд, ялалт хүртэл зүтгэсэн монгол зүтгэлд, ялалт хүртэл дэвссэн монгол сэтгэлд, ялалтад дөхүүлсэн монгол морьддоо мэхийе! Орос, Украины дайныг одоо бид биш, он цаг өөрөө шүүнэ, орчлонгийн тоосыг арчиж тэр шүүлтийг харахын тулд тэнцэж үлдэх л чухал шүү дээ, миний хөөрхөн, хоёрхон хөрштэй хонгорхон монголчууд аа..." гэжээ.
