УИХ-ын сонгууль хаяанд ирсэн энэ цаг үед улстөрчид болон Төрийн албаныхан “хөдлөөд” эхэлжээ. Эхнээсээ нэр дэвших тойргоо усалж, багаа бүрдүүлж, ил далд сурталчилгаагаа эхлүүлсэн байна гэх мэдээлэл ч мэр сэр гарах болов. Тэгвэл Хөдөлмөр нийгмийн хамгааллын яамны Төрийн нарийн бичгийн даргаар ажиллаж байгаа Г.Өнөрбаяр буурь сэлгэж, төрсөн нутгаа барааджээ. Тэрбээр төрсөн нутаг болох Завханаа бараадах болсон цаад шалтгаан нь ирэх 2024 оны сонгуульд нутгаасаа нэр дэвшиж хүч үзэхээр болжээ. Төрийн албанд олон жил тогтвор суурьшилтай ажилласан тэрбээр өөрийгөө их хурлын гишүүн болгож өндөрт шидэхээр шийдсэн бололтой. Тодруулбал, Завхан аймгийн Засаг дарга Д.Түвшинжаргалыг “унагаж” оронд нь Г.Өнөрбаяр очихоор улстөрийн тохироо хийжээ. Бүтэн нэг жил гаруйн хугацаанд тэрбээр аймгийнхаа Засаг даргыг хийж санал өгөх сонгогч түмэндээ танигдаж, харааг нь булааж харцыг нь татах овжин аргыг хэрэглэхээр шийджээ. Тухайлбал, УИХ-ын гишүүн биш, өмнө нь нэр дэвшиж байгаагүй түүнийг Завханчууд сайн танихгүй, мэдэхгүй шүү дээ. Тиймээс эртнээс өөрийгөө таниулж, тойргоо усалж, санал өгөх иргэдээ тордохоор болсон бололтой.
Тэрбээр Завхан аймгийн Тосонцэнгэл суманд төрж өссөн бөгөөд одоогоор Завхан аймагтаа сургалт хийж байгаа сурагтай. Яам нь сайдгүй эзэнгүй байхад, Төрийн нарийн нь 1000 км-ын цаана сургалт хийгээд явж байх жишээний. Мэдээж сургалт нэрийн цаана судалгаа нэртэй далд сурталчилгаа явж байхыг үгүйсгэхгүй юм. Г.Өнөрбаярын хувьд нэр тийм ч цэвэр нэгэн биш. Салбартаа л шударга дарга гэдэг. Тэгэхээр 2024 оны сонгуульд Завханчуудын сонголт мэднэ. Төрийн албанд ажиллаж байсан хүн төрд гараад юу хийх вэ гэдгийг сонгогчид гярхай байж мэдэх ёстой. Түүнээс биелэгдэшгүй худлаа амлалтад хууртагдах цаг үе өнгөрсөн шүү. Ер нь эрх барьж байгаа намаас Г.Өнөрбаярт илгээлт өгч явуулж байгаа явуулга гэж харж, хардаж байна. Тийм учраас сонголт хийх ард иргэд хариуцлагатай, гярхай чамбай байгаарай.
Харин Г.Өнөрбаярын оронд Төрийн захиргаа удирдлагын газрын дарга Ч.Цэвэгдоржийг томилжээ. Ийнхүү Төрийн нарийн бичгийн даргын суудлаа хүлээлгэж өгсөн Г.Өнөрбаяр удахгүй Завхан аймгийн Засаг даргын суудал, тамга тэмдгээ гардан авч, тэнд төвхнөх нь ээ.
Ингээд Гомбосүрэнгийн Өнөрбаярын танилцуулга:
Төгссөн сургууль, мэргэжил
1997 онд Завхан аймгийн Тосонцэнгэл сумын 10 жилийн 1-р дунд сургууль,
2001 онд МУИС-ийн Нийгмийн Шинжлэх Ухааны Сургууль (Ph.D),
2013 онд Японы Кюшүгийн Их сургуулийг тус тус төгссөн.
Ажилласан байдал
2001-2003 МУИС-ийн НШУС-д цагийн багш
2003-2005 МУИС-ийн НШУС-д дагалдан багш
2005-2007 МУИС-ийн НШУС-д багш
2007-2009 МУИС-ийн НШУС-д дэд профессор
2005-2006 Үйлдвэр, Худалдааны Яаманд мэргэжилтэн
2006-2007 Барилга, Хот Байгуулалтын Яаманд хэлтсийн дарга
2008-2009 Гадаад Харилцааны Яаманд мэргэжилтэн
2009-2012 Монгол Улсын Ерөнхий сайдын зөвлөх
2013-2016 УИХ-ын Тамгын газар, УИХ дахь МАН-ын бүлэгт зөвлөх, Ажлын албаны дарга
2016.09.21 Хөдөлмөр, Нийгмийн Хамгааллын Яамны Төрийн Нарийн бичгийн даргаар ажиллаж байгаа юм.
