Консул асан Д.Мөнх-Эрдэнийн эрүүгийн хэргийн шүүх хурал СБД-ийн эрүүгийн хэргийн анхан шатны шүүхэд гурван өдөр үргэлжилж, шүүх шийдвэрээ гаргалаа.
Түүнийг эрх мэдэл, албан тушаалын байдлаа урвуулан ашиглан бусдад давуу байдал олгож их хэмжээний хохирол учруулж бүлэглэсэн, нийтийн албан тушаалтанд хахууль өгсөн, хүний нэр төр, алдар хүндэд халдаж худал мэдээлэл тараасан гэм буруутайд тооцож, Д.Мөнх-Эрдэнийг 4 жил нээлттэй хорих ангид ял эдлүүлэх, нийтийн албанд томилогдох эрхийг 5 жил хасах шүүхийн шийдвэр гарлаа. Түүний нагац эгч Ж.Энхтуяа "Миний дүүг Ц.Нямдоржийн захиалгаар 90 хоног яллаж яллачихаад 4 жилийн хорих ял оноож байна. Би та нарыг яаж явахыг чинь харна. Үр хүүхдүүд нь хүлээж байхад, хэлэх ч үг олдохгүй, гомдолтой байна" гэлээ.
Түүнийг консулаар ажиллаж байхад нь 76 мкв гурван өрөө орон сууцаар хангаж байхад ӨМӨЗО-ны Хөх хот дахь Сайхан дүүрэгт байрлах 200 мкв гурван өрөө орон сууцыг иргэн н.Баттай түрээсийн гэрээ байгуулж 92 сая төгрөгийг төсвийн мөнгөөс олгосон, мөн хуурамч материал бүрдүүлж өөрийн хүүхдүүддийн сургалтын төлбөрт 42 мянган юань буюу 15 сая төгрөгийг төлсөн мэтээр мөнгө гаргуулж өөрийн эхнэрт өгсөн, 2018 онд дэд консул н.Батзоригт 1,7 сая төгрөг олгохоос 700 мянган төгрөг илүү олгож 2,5 сая төгрөг олгосон, мөн Адьшаа Бямбаад 1,3 сая төгрөг олгохоос 300 мянган төгрөг илүү олгосон, мөн эхнэртээ 551 мянган төгрөг илүү олгосон, мөн 2021 оны 10 сарын 21-ны өдөр Даваагийн Мөнх-Эрдэнэ гэх хаягнаас Ц.Нямдорж гуайн нууц амраг Соёлын яамны хуурамч дүгнэлт гаргадаг ТНБД асан С.Оюунбилэг хэмээх нийтлэлийг гаргасан нь хохирогч С.Оюунбилэгийн нэр хүндэд халдаж, хуурамч мэдээлэл олон нийтэд тараасан, Гадаад хэргийн яам руу хүч хэрэглэн эсэргүүцсэн, "Евро сервис" ХХК-ний захирал Ганбаяртай бүлэглэж Залаатын аманд 0.35 га талбайг ашиглах хугацаа сунгах гэрчилгээ гаргуулж бусдад давуу байдал олгох зорилгоор УИХ-ын Тамгын газрын Хэвлэл мэдээллийн ОНХХ-ийн даргаар ажиллаж байсан Б.Эрдэнэбаярт 30 сая төгрөгийн хахууль өгсөн эдгээр нь эрүүгийн хуульд заасан гэмт хэрэг мөн бөгөөд тогтоогдож байна хэмээн шүүхээс үзсэн юм.
Д.Мөнх-Эрдэнийн үйлдлийн улмаас 112 сая төгрөгийн хохирол учирсан, үүнээс 82 сая төгрөгийг Д.Мөнх-Эрдэнээр гаргуулж улсын төсөвт олгох, гэмт хэрэг үйлдэж олсон орлого болох 20 сая төгрөгийг Эрдэнэбаяраас гаргуулах, мөн 10 сая төгрөгийг Д.Мөнх-Эрдэнээс гаргуулан улсын орлого болгохоор тус тус шийдвэрлэжээ.
