Үзэсгэлэн болгогч хэмээх усан туулай жилийн сар шинийн баярт зориулсан улс, аймгийн цолтой бөхийн барилдаанд дөрөв давсан бөхчүүдээс явцын шинжилгээ авсан билээ. Тэгвэл уг шинжилгээний хариу Өмнөд Солонгосын итгэмжлэгдсэн лабораториос ирж, нэг бөхөөс допинг илэрсэн гэнэ. Харин тэр бөхийн нэр хэн бэ, гэдэг бөх сонирхогчид таамаг дэвшүүлсээр байна. Тэр дундаа улсын арслан Э.Оюунболдыг хэрэглэсэн байх магадал өндөртэйг бөх сонирхогчид дуу нэгтэй хэлж байна. Бид энэ талаар Монголын үндэсний бөхийн холбооны тэргүүн Ц.Магалжаваас тодрууллаа. Тэрбээр “Бөхчүүдийн хариу ирсэн. Нэг бөхийн шинжилгээний хариу эерэг гарсан нь үнэн. Журмаараа тухайн бөхөд бид хариуг танилцуулсан. Тухайн бөх Б сорьцын шинжилгээ өгөх эсэхээ 14 хоногийн дотор Допингийн эсрэг үндэсний төвд мэдэгдэнэ. Тэр болтол МҮБХ тухайн бөхийн нэрийг зарлах нь хуулиар хориотой. Тиймээс нэрийг зарлах ямар ч боломжгүй” гэлээ.
