/2023.4.3/ "Тариалангийн сэргэлт 2023" чуулган яг одоо Засгийн газрын ордонд болж байна.
Чуулганы үеэр ХХААХҮ-ийн сайд Х.Болорчулуун сэтгүүлчдэд мэдээлэл өглөө. Тэрбээр:
-Энэ жилээс үр тариа эрхлэгчдэд 90 тэрбум төгрөгийн хөнгөлөлттэй зээл олгоно. Энэ нь жилийн 5-6 хувийн хүүтэй, 2-3 жилийн зээл байх юм. Мөн хүнсний ногоо эрхлэгчдэд 30 тэрбум төгрөгийн хөнгөлөлттэй зээлийг мөн адил хугацаа, хүүтэйгээр олгоно.
Зоорь бэлтгэхэд 90 тэрбум төгрөг, услалтын систем байгуулахад 47 тэрбум төгрөгийн, үтрэмийн талбай байгуулахад 17 тэрбум төгрөгийн хөнгөлөлттэй зээл зэрэг чиглэл тус бүрт хөнгөлөлттэй зээлийг олгоно гэлээ.
Одоогийн байдлаар арилжааны банкуудын зээлийн хүү 18 хувь байгаа. Тиймээс дээрх хөнгөлөлттэй зээлийг олгохдоо хүүгийн зөрүү болох 15 хувийг төр даана гэдгийг Х.Болорчулуун сайд хэллээ. Мөн зээлийг олгохдоо нэг тэрбум төгрөгөөс дээш төгрөгийн зээл хүсэгч компанитай нэг талаас банк, нөгөө талаас ХХААХҮЯ гурвалсан гэрээ байгуулж зээлийг олгоно гэв.
Манай улсын хувьд хүнсний ногооныхоо 73 хувийг өнөөдрийн байдлаар дотоодоосоо хангаж байгаа юм.
