Криптовалютын салбартаа тэргүүлэгч Биткоин энэ оны эхний улиралд 70 гаруй хувиар өсчээ. Өнгөрсөн жилийн туршид 60 гаруй хувиар унасан тус виртуал валет сүүлийн гурван сарын дотор ийнхүү амжилттай сэргээд байна.
Bloomberg News агентлагийн орон нутгийн цагаар 1-ний өдрийн мэдээлснээр, өнгөрсөн оны сүүлчээр 16 мянган ам.доллароор арилжаалагдаж байсан Биткоин өнгөрөгч 3-р сарын сүүлийн өдөр 28 мянган ам.доллароор арилжаалагдсан болохыг онцлон тэмдэглэв.
Ингэснээр энэ он гарсаар гурван сарын дотор 72 хувиар өссөн гэсэн үг бөгөөд энэ нь нэг улиралд 104 хувиар өссөн 2021 оны эхний улирлаас хойш сүүлийн хоёр жилийн хугацаанд үзүүлсэн хамгийн өндөр өсөлт юм.
Түүнчлэн тус мэдээнд дурдсанаар “Өнгөрсөн оны арваннэгдүгээр сард Биткоины ханш доод цэгтээ хүрснээр урт хугацааны хөрөнгө оруулагчид уг зах зээлийг орхих нь цаг хугацааны асуудал байсан юм” хэмээн дүгнэсэн байна.
Харин саяхан болж өнгөрсөн Silicon Valley зэрэг уламжлалт банк дампуурсан явдал нь виртуал валютуудад сэргэх боломжийг бүрдүүлсэн гэхэд хилсдэхгүй. Тодруулбал Bloomberg News агентлагийн тооцоолж буйгаар Silicon Valley банк дампуурснаас хойш буюу сүүлийн гурван долоо хоногт Биткоины ханш 40 хувиар өссөн байна.
Эх сурвалж: MBC