Өнөөдөр хүн бүр л ёс суртахууныг эрэлхийлж байна. Өөр өөрийн ёс суртахуундаа үнэлэлт дүгнэлт хийж байгаа энэ цаг үед бид амьдарч байна.
Нэгэн үе УИХ-ын гишүүн байсан Л.Эрхэмбаяр өөрийн цахим хуудсандаа "ЁС СУРТАХУУНЫ ЭРЭЛД-2" гэсэн байр суурийг илэрхийлжээ.
Тэрбээр "Та аль тамгаа дагаж байна? гэж асуух хүн олонтой.
Ёс суртахууныг л дагана уу гэхээс тамга дагахгүй ээ гэж хариулдаг. Ёс суртахууны үр хөврөл нь ирээдүйн улс орны хувь заяа, ирээдүйн Монгол хүний төлөвшил учраас энэ асуудалд хатуу хандахаас өөр аргагүй.
Уг лидэр нь ёс суртахуунгүй, ерөнхий хүмүүжил, төлөвшил үгүй бол ямар ч хууль ёсны тамгатай байгаад олон түмнийг дагуулж чадахгүй. Тамга бол ёс суртахууны хажууд жижигхэн юм шүү дээ. Харин ёс суртахуунтай хүнд тамга байх аваас түүнийг улам хүчирхэг болгоно.
Аль ч улс төрийн намын манлайлагч наад зах нь худлаа хэлдэггүй, хулгай хийдэггүй, нийтээр хэлэлцээд баталсан дүрэм журмаа баримтлах тал дээр өөрөө үлгэрлэл үзүүлдэг байх ёстой ажгуу. Ардчилсан намын хувьд одоо л гишүүд нь ёс суртахууны тухай ярьдаг, эрэгцүүлдэг, хичнээн чухал асуудал болохыг нь мэдрэх маягтай болж байх шиг. Гэхдээ л ёс суртахууны хувьд хариуцлага хүлээвэл зохих нөхөр дахиад л улс төрийн өндөрлөг рүү тэмүүлэх, түүнийг нь дэмжээд л зүтгүүлэх. Зүтгэж буй, дэмжиж буй аль алинтай юу ч ярихав дээ.
Бас нэгэн санаа: “Ардчилал” гэдгийг аль нэг нам өмчлөх нь орчин цагт бүр утгагүй. Консерватив, демократ, бүгд найрамдах, социал ямар ч үзэл баримтлалтай улс төрийн нам байлаа гэсэн хүний эрх, эрх чөлөө, өмч хөрөнгөтэй байх, шашин шүтэх эс шүтэх гэх мэт ардчилалын наад захын хэм хэмжээг зүгээр л дээдэлж, мөрдөж байна. (Орос, Хятад зэрэг цөөн орныг эс тооцвол.) Харин бодлогынхоо эхэнд халамжийг тавих уу? эдийн засгийн сэргэлт, бүтээн байгуулалтыг чухал гэж үзэх үү, дундуур нь бодлоготой байх уу гэдэг дээрээ л намууд өөр өөр байгаад байна. Манайх шиг хий хоосон ардчилал гэж орилолдохоо больчихоод байнаа, улс орнууд.
Бас нэгэн санаа: Сүүлийн үед төр засгаас хулгайчуудтайгаа тэмцэж эхлэх гэж байх шиг байна. МАН, АН аль аль нь улс төржиж өөрсдийгөө хамгаалахгүй, тэдний намынхан л “баба” гэж харуулах гэсэн өчүүхэн бодол өвөрлөхгүй, нийлээд улс орноо тонон дээрэмдсэн хулгайчуудтай тэмцэх хэрэгтэй. Та нар нэг л биш байна шүү, олон түмэн мэдрээд л байгаа. Мэдээлэлийг ямар их нууна вэ? Хулгайгаа л нуугаад байх шиг. Нэг л их олон хулгайч зарлагдаад л хэсэг хугацааны дараа мартагдаад л. Эсвэл тэр хулгайчууд чинь та нарыг илчилнэ гэж дарамтлаад байгаа юм уу? Нэг л биш ээ.
Бас нэгэн санаа: Энэ сайхан залуучуудыг багаас нь ёс суртахуугүй улс төрөөр бохирдуулах талруугаа яваад байгаагаа намуудын лидерүүд, гол тархи толгой нь болсон хүмүүс нь ойлгоосой. Амьдарлын бат бөх сууриа хөдөлмөрлөж тавина уу гэхээс нам дагаж тавихгүй ээ залуучууд аа.
Бас нэг санаа: Компани удирдаж хүн ажиллуулна гэдэг бол зөвхөн мөнгө олох хэрэг биш. Улсын хамгийн том баялаг болох хүнээ хүмүүжүүлэх, хөдөлмөрт хайртай болгож төлөвшүүлэх асуудал юм шүү. Компани бол Монгол хүнийг зөв төлөвшүүлэх үүр, уурхай юм. Компанийн захирлууд өөрсдөө ёс суртахууны хувьд зөв төлөвшиж, уншиж, сонсож, суралцаж Монголдоо хувь нэмэрээ оруулах хэрэгтэй. Нэг ажилтан ажиллуулсан ч та сургагч, үлгэрлэгч, манлайлагч болж байгаагаа ойлго." гэжээ.
