Эмнести Интернэшнл байгууллагаас "Дэлхийн хүний эрхийн төлөв байдал, Монгол дахь тусгал" хэлэлцүүлгийг зохион байгуулсан юм. Хэлэлцүүлгийн үеэр 2022 онд хүний эрхийн төлөв байдал дэлхийн хэмжээнд болоод манай улсын тухайд ямар түвшинд байсан талаар дэлгэрэнгүй тайлагнаж, мэдээллээ. Тайланд дурдсанаар дэлхийн улс орнууд хүний эрхийн асуудалд ялгавартай хандаж, олон улсын хамтын нийгэмлэг нийтлэг үнэт зүйлсэд нэгдмэл байр суурийг илэрхийлж чадахгүй байгаа талаар онцлов. Мөн Хүний эрхийн түгээмэл тунхаглал батлагдсаны 75 жил, Хүний эрх хамгаалагчийн тунхаглал батлагдсаны 25 жилийн ойг тохиолдуулан Эмнести Интернэшнл хүний эрхийн олон улсын тогтолцоог сайжруулах шаардлагатайг мөн онцолсон юм.
Тус хэлэлцүүлгийн үеэр Хүний Эрхийн Үндэсний Комиссын гишүүн Г.Нарантуяа "Монгол улс дахь хүний эрхийн нөхцөл байдлын талаар мэдээлэв. Тэрээр "Манай улсын хүний эрх, эрх чөлөөний талаарх 22 дахь удаагийн илтгэлийг ХЭҮК-оос УИХ-д хүргүүлэхэд бэлэн болсон. Нийгэм, эдийн засаг, соёлын эрх чөлөөнд төдийлөн ахиц дэвшил гараагүй. Дэлхий нийтэд улс төрийн эрх чөлөөг үнэлэх олон индекс бий. Индекс бүрийн үнэлгээ нэг дүнг харуулж буй нь эрх чөлөөт ардчилсан орон зай хумигдаж буйг илтгэнэ. Дэлхийн хүн амын 10 хүн тутмын нэг нь эрх чөлөөт орон зайд амьдарч байгаа гэсэн статистик мэдээлэл бий. Манай улсын иргэдэд үзэл бодлоо илэрхийлэх эрх чөлөө бий. Гэхдээ энэ нь жагсаал цуглаан зохион байгуулах, үзэл бодлоо илэрхийлэх, хэвлэн нийтлэх эрх чөлөөтэй байна гэсэн үг биш.
ХЭҮК дүгнэснээр шүүмжлэлтэй дуу хоолой илэрхийлж буй үйл явцыг намжаахын тулд шууд болон шууд бус арга хэмжээ авч байна. Бид нөхцөл байдалд үнэлэлт дүгнэлт хийхийн сацуу эрх зүйн шийдлийг мөн санал болгож байгаа. Жагсаал цуглаан хийх журмын, Хэвлэлийн эрх чөлөөний тухай хууль, Төрийн бус байгууллагын эрх зүйн зохицуулалтыг хийхдээ яаж нүдээр харж, ямар асуудлыг тусгаж, ямар чиглэлээр бичих нь ардчилсан эрх чөлөөт Монгол Улсад чухал юм уу гэдэг асуултад хариулт өгөхийг зорьж, хүний эрх чөлөөний төлөв байдлын илтгэлд иргэний оролцооны эрх зүйн зохицуулалт гэдэг бүлгийг оруулсан" гэлээ.
Мөн тэрээр нийслэлчүүд эрүүл аюулгүй орчинд амьдрах нөхцөл боломж хангагдсан эсэх эргэлзээтэй асуудал гэдгийг онцолсон юм.
