УИХ дахь МАН-ын бүлгийн ээлжит бус хурал өчигдөр /2023.03.29/ болсон. Хурлаар УИХ-ын гурван гишүүний бүрэн эрхийг түдгэлзүүлэх тухай Ерөнхий прокурор Б.Жаргалсайханаас ирүүлсэн саналыг УИХ-ын Халдашгүй байдлын дэд хороогоор хэлэлцсэн шийдвэрийг хэлэлцэв.
Хурлаар УИХ-ын Халдашгүй байдлын дэд хорооны шийдвэрийг дэмжиж, УИХ-ын гурван гишүүнийг бүрэн эрхээс нь түдгэлзүүлье гэдэгт бүлгийн гишүүдийн дийлэнх олонх санал нэгдсэн. Энэ асуудалд УИХ-ын гишүүн Н.Наранбаатар сэтгүүлчдэд байр, сууриа илэрхийллээ.
Тэрбээр "Миний дүү бизнес хийдэг. Хоёр автомашин ном, журмаар нь оруулж ирсэн. Тэрийгээ зээлээр авсан, төлөөд л явж байгаа. Намайг Өмнөговь аймгийн Засаг дарга байхад 60 сая төгрөгийн тендер зарласан. Үүнд нэг компанитай түншлээд "Сэрсэн говь" ХХК орсон. Өөр өрсөлдөгч байхгүй ганцаараа байсан тул энэ тендерийг авсан. Засаг дарга хүн захирамж гаргах үүрэгтэй шүү дээ. Авлигын эсрэг мэдүүлгээ бөглөөд л захирамжаа гаргасан. Засаг дарга хийж байсан хүнээс ийм жижиг, сажиг асуудал олдох л юм билээ дээ.
УИХ-ын гишүүн болоод, хуучин байраа зараад, УИХ-аас хөдөөгийн гишүүдэд өгсөн 50 сая төгрөгийн дэмжлэгийг нэмээд, үлдсэнийг нь банк, ах дүү хамаатан саднаасаа зохицуулаад Маршал таунд байр авсан юм. Гэтэл үндэслэлгүй хөрөнгөжсөн болчихсон" гэв.
