ОХУ-ын Батлан хамгаалах яам орон нутгийн цагаар 29-ний өдөр “Ярс" тив алгасагч баллистик пуужин (ICBM) зэргийг оролцуулсан стратегийн цөмийн хүчний сургуулилалтыг эхлүүлснээ мэдэгдэв.
ТАСС болон Ройтерс агентлагийн мэдээлснээр, ОХУ-ын Батлан хамгаалах яам мөн өдөр хийсэн мэдэгдэлдээ “Энэ жилийн стратегийн цөмийн хүчний сургуулилалтын төлөвлөгөөний дагуу (Сибирийн) Омскийн пуужингийн арми болон “Ярс” тив алгасагч баллистик пуужинт Новосибирскийн пуужингийн хүчинд шалгалтын иж бүрэн сургуулилалтыг эхлүүллээ” хэмээн цохон тэмдэглэсэн байна.
“Уг сургуулилалтад 3000 гаруй цэрэг, 300 орчим цэргийн техник хэрэгсэл оролцохоос гадна стратегийн цөмийн пуужингийн цэргийн командлал цэргийн үүрэг гүйцэтгэх бэлэн байдлыг шалгах болно” хэмээн уг мэдэгдэлд дурджээ.
Түүнчлэн сургуулилалтыг өөр 2 мужид хийхээр төлөвлөсөэ ба энэ үеэр “Ярс” пуужингаар тоноглогдсон хөдөлгөөнт хөөргөх машины (TEL) маневрлах чадварыг дээшлүүлэх, пуужинг өнгөлөн далдлах, орчин үеийн агаарын тагнуулын үйл ажиллагааг саармагжуулах зэрэг сургуулилалтыг хийж гүйцэтгэнэ хэмээн нэмэлт тайлбар хийсэн байна.
ОХУ өнгөрсөн жил стратегийн цөмийн хүчний зэвсэг ашиглан хэд хэдэн цэргийн сургуулилалтыг мөн хийсэн билээ. Тухайлбал өнгөрөгч 10-р сард ерөнхийлөгч Владимир Путиныг байлцуулан баллистик болон далавчит пуужин хөөргөх зэрэг стратегийн цөмийн хүчний уламжлалт сургуулилалтыг хийсэн юм.
АНУ-ын пуужингийн довтолгооноос хамгаалах системийг (MD) сөрөх чадвартай хэмээн үнэлэгддэг “Ярс” систем нь тус тусад нь чиглүүлэх боломжтой багаар бодоход дөрвөн цэнэгт хошуугаар тоноглогдсон (Multiple independently targetable nuclear warhead) бөгөөд байгаа онохын тулд 12,000 километр зайг туулах чадвартай аж. Энэхүү системийг 2010 онд хамгийн анх зэвсэглэлд нийлүүлж байв.
Тодруулбал цэнэгт хошуу бүрийн хүч нь 150-250 килотонн (тротил тэсрэх бодисын тэсрэх хүчин чадал дээр үндэслэн 150,000-аас 250,000 тонн) байдаг ба энэ нь Номхон далайн дайны үеэр Японы Хирошимад хаясан атомын бөмбөгөөс (16 килотонн) 10-15 дахин хүчтэй гэсэн үг юм.
Эх сурвалж: JoongAng
