Оросын өдөр тутмын Комерсант сонины орон нутгийн цагаар 28-ны өдөр мэдээлснээр тус улсад өнгөрсөн онд хүн амины хэрэг болон хүний аминд санаатайгаар хүрэхийг завдсан хэргийн гаралт сүүлийн 20 жилийн хугацаанд анх удаа нэмэгдсэн байна.
ОХУ-д хүчирхийллийн гэмт хэргийн хохирогчдыг хамгаалах чиглэлээр мэргэшсэн хуульчдын зүгээс нэгтгэн гаргасан “Зэвсэгт мөргөлдөөн болж буй улс орнуудад хүчирхийлэл нэмэгдэж буй байдал” гэх тайланд дурдсанаар, 2022 онд ОХУ-д хүн амины хэрэг, хүний аминд хүрэхээр завдсан гэмт хэргийн гаралт өмнөх жил 7332 байсан бол энэ жил 7628-д хүрч 4 хувиар нэмэгджээ. Тодруулбал 2002-2021 оны хооронд тус улсад хүн амины хэрэг болон хүний аминд хүрэхийг завдсан хэрэг 32,265-аас 7,332 болж тасралтгүй буурч байсан аж.
Өнгөрсөн онд хүн амины хэрэг болон хүний аминд санаатайгаар хүрэхийг завдсан хэрэг мэдэгдэхүйц өссөн бүс нутгуудын дунд Украин дахь цэргийн тусгай ажиллагааны тулааны талбартай зэргэлдээх бүс нутгууд олон байжээ.
Тухайлбал Украинтай хил залгаа ОХУ-ын баруун хэсэгт орших Белгород мужийн хувьд 2021 онд хүн амины хэрэг болон хүний аминд хүрэхийг завдсан хэрэг 52 гарч байсан бол өнгөрсөн жил 102, баруун хэсэгт орших өөр нэг хилийн бүс болох Курск хотод энэ төрлийн хэрэг 58-аас 89 болж тус тус өссөн байна. Түүнчлэн Тамбов, Москва, Алс Дорнодын Бүгд Найрамдах Буриад улс зэрэг хилийн бүс нутгаас бусад бүс нутгуудад ч ийм дүр зураг ажиглагджээ.
Тайланг нэгтгэн гаргасан хуульчдын төлөөлөл дайн байлдаанд оролцох, эсвэл мөргөлдөөнтэй бүс нутагт оршин суух нь иргэдэд хэрхэн шууд нөлөөлдөг талаарх гадны судалгаанаас иш татан, өнгөрсөн онд хүн амины хэрэг, хүний аминд хүрэхийг завдсан хэрэг нэмэгдсэн нь Украин дахь цэргийн тусгай ажиллагаатай шууд болон шууд бус хүчин зүйлээрээ холбоотой байж болзошгүй гэж тайлбарлав.
Юуны өмнө ОХУ-д өнгөрсөн онд улаан буудайн архи төдийгүй ихэнх төрлийн согтууруулах ундааны борлуулалт өмнөх онтой харьцуулахад өссөнийг дурдаад тус улсад гарч байгаа хүн амины хэргийн 70-80 хувь нь согтуугаар үйлдэгддэг болохыг онцолжээ.
Дайн тулаанд өөрийн биеэр орлцсон болон түүнээс шууд хэлбэрээр хохирол амссан иргэд нэг төрлийн стресст өртөж тэр нь эмгэг байдлаар (PTSD) илэрдэг ба энэ нь хүн амины хэрэг, хүний амь насанд санаатайгаар хохирол учруулахаар завдсан хэргийн гаралтад нөлөөлсөн байж магадгүй гэж таамаглав.
Гэвч зарим төрлийн гэмт хэргийн гаралт нэмэгдсэн нь Украин дахь цэргийн тусгай ажиллагаа болон архины өндөр хэрэглээтэй уялдаа холбоотой эсэхийг тодруулахын тулд социологийн өргөн хүрээтэй судалгаа хийх шаардлагатай гэж орон нутгийн криминологич, мөрдөн байцаагч асан Игорь Маркелов үзжээ. Түүнчлэн хүн амины хэрэг, хүний аминд хүрэхийг завдсан хэргүүд нэмэгдэж байгаа нь цагаачлал болон хүн амын шилжилт хөдөлгөөнтэй холбоотой байж болзошгүй гэж нэмж дурдсан байна.
Орон нутгийн өөр нэгэн хэвлэл мэдээллийн хэрэгслээр хүн амины хэрэг өссөн нь ядуурал, ажилгүйдэл, нийгэм, эдийн засгийн тогтворгүй байдлаас үүдэлтэй байж магадгүй гэж дүгнэжээ.
Үүний зэрэгцээ ОХУ-ын Эрүүл мэндийн яам Украинд явуулж буй цэргийн тусгай ажиллагаанд өөрийн биеэр оролцсон залууст тусламж үзүүлэх зорилгоор энэ жил анх удаа гэмтлийн дараах стрессийн эмгэгийг эмчлэх ажлын хэсэг байгуулаад байгаа билээ.
Эх сурвалж: Yonhap