УИХ-ын үйл ажиллагааны сандал, суудлын хэрүүлийг л олон нийт анхаарна уу гэхээс тэнд хэнээс ямар бодлого гарч, тэр нь хуульд хэрхэн тусгагдаж байгаа талаар бид огтоосоо ч сонирхдоггүй.
Энэ уламжлалаар өнөөдөр гурван гишүүний асуудалд бүгд анхаарлаа хандуулж байна. УИХ-ын гишүүн Д.Бат-Эрдэнэ, Т.Аюурсайхан, Н.Наранбаатар нарын бүрэн эрхийг түдгэлзүүлэх эсэх асуудлыг өнөөдөр Халдашгүй байдлын дэд хорооны хуралдаанаар хэлэлцэж байна.
УИХ-ын Халдашгүй байдлын дэд хороо гурван гишүүний бүрэн эрхийг түдгэлзүүлэх эсэхийг хэлэлцэж, нууцаар санал хураана. УИХ-ын тухай хуулийн 28.6.Улсын Их Хурлын гишүүний халдашгүй байдлын дэд хороо Улсын Их Хуралд хамгийн олон удаа сонгогдсон таван гишүүнээс бүрдэх бөгөөд Улсын Их Хурлыг хугацаанаас нь өмнө тараах, гишүүний бүрэн эрхийг түдгэлзүүлэх, эгүүлэн татах талаар энэ хуульд заасан эрх бүхий байгууллага, албан тушаалтнаас Улсын Их Хуралд ирүүлсэн саналыг судалж санал, дүгнэлт гарган зохих Байнгын хорооны болон нэгдсэн хуралдаанд оруулна.
Халдашгүй байдлын дэд хорооны бүрэлдэхүүнд
- Цэндийн Мөнх-Оргил /Халдашгүй байдлын дэд хорооны дарга/
- Нямаагийн Энхболд
- Сүхбаатарын Батболд
- Бадмаанямбуугийн Бат-Эрдэнэ
- Сандагийн Бямбацогт нар байдаг.
УИХ-ын Халдашгүй байдлын дэд хорооны хуралдаанд Улсын ерөнхий прокурор Б.Жаргалсайхан оролцож байгаа бөгөөд "Нэр бүхий гурван гишүүний бүрэн эрхийг түдгэлзүүлэх зайлшгүй шаардлага байгаад, мөрдөх байгууллагын ажиллах боломжийг нь бүрдүүлэх үүднээс энэ асуудлыг УИХ-д оруулж ирсэн. Түүнээс аль нэг гишүүний гэм буруугийн асуудлыг шийдэх гэж оруулаагүй. Мөрдөн шалгах ажиллагаа явж байна. Үндэслэл байгаа учраас яллагдагчаар татсан” гэж байр сууриа илэрхийлсэн.
Харин нүүрсний хэрэгт яллагдагчаар татагдан Авлигатай тэмцэх газарт шалгуулж буй УИХ-ын гишүүн Н.Наранбаатар “УИХ-ын гишүүний бүрэн эрхээсээ түдгэлзүүлэхгүйгээр шалгуулмаар байна. Манай тойрог гишүүнгүй болох гээд байна. Өмнөговь аймгаас хоёр гишүүн сонгогдсон. Хоёулангийнх нь бүрэн эрхээсээ түдгэлзчихээр тэр тойрогт ажиллах төлөөлөгч байхгүй болно. Тиймээс эрхээсээ түдгэлзэхгүйгээр шалгуулмаар байна.
Өнгөрсөн жил Хөгжлийн банкны дөрвөн гишүүний асуудлыг оруулж ирэхэд УИХ бүрэн эрхийг нь түдгэлзүүлээгүй, тэд шалгуулаад одоо хэрэг нь шүүхийн шатанд явж байна. Ийм байдлаар шалгуулах бүрэн боломжтой” гэдэг тайлбар хийгээд буй юм.
Харин Халдашгүй байдоын дэд хорооны дарга, УИХ-ын гишүүн Ц.Мөнх-Орил “Одоо УИХ-ын гишүүнээс түтгэлзүүлэхээр санал оруулж ирсэн гишүүдээс тайлбар авч эхлэх гэж байна. Холбогдсон хэрэгүүдтэй бүрэн танилцаагүй байна. Зах зухаас нь танилцаад эхэлж байна. Одоогоор Т.Аюурсайхан гишүүний асуудлыг хэлэлцэж байна. Хуулийн дагуу гишүүдийн бүрэн эрхийг түтгэлзүүлэх эсэх асуудалд нууцаар санал хураалт явуулна” гэх тайлбарыг өглөө.