Монголын түүхэнд анх удаа Хойд Америкийн Сагсан бөмбөгийн коллежид тэтгэлэг авч нэгдүгээр дивизоны багт тоглосон Ш.Энхийн-Од Дэйтон Флайэрс багтаа нэг жил тоглосны эцэст NBA-ийн драфтад нэрээ өгөхөөр шийдвэрлэлээ. "Rize Management" компанитай агентийн гэрээ байгуулж, Скотт Николс гэж эрхэм Энхийн-Одын төлөөлөгч болсныг ESPN-ний драфт аналист, draftexpress.com сайтыг санаачлагч, спортын сэтгүүлч Жонатан Гивони өөрийн твиттертээ зарлалаа.
Гэхдээ энэ нь шууд утгаараа NBA-д орно эсвэл орох боломж нээгдсэн гэсэн үг биш юм. Ш.Энхийн-Одын хувьд энэ жил 20 настай. Ихэнхи мэргэжлийн лигт нэрээ өгдөг тамирчдын дундаж нас 19. Их сургуульд тоглох нь тамирчдад маш их ачаалал болдог учраас сүүлийн жилүүдэд тоглогчид их сургуульдаа нэг жил тоглоод NBA-н драфтад нэрээ өгөх нь түгээмэл болсон. Мөн их сургуулийн сагсан бөмбөгөөс татгалзаж G-League, Европын багуудтай гэрээ хийснээр дараагийн улирлаас NBA-д нэрээ өгч сонгогдох явдал ч ихэссэн. Үүний тод жишээ нь хэдхэн жилийн өмнө ЛаМело Болл Австралийн NBL-д нэг жил тоглоод драфтад нэрээ өгсөн бол энэ жилийн драфтын 2 дахь сонголт гэж яригдаад байгаа Скүүт Хендерсон яг одоо "G-League"-ийн Ignite багт тоглож байна. Тэгэхээр Энхийн-Одын гаргасан шийдвэрийг Америк дахь сагсан бөмбөгийн замналын трэндийг дагасан шийдвэр гэж харж болно. Ямартай ч Мike-н хувьд коллежийн сагсан бөмбөгөөс шинэ алхам хийж Европын лиг, G-лигт тоглох боломж нь бүрэн нээгдэж цаашлаад NBA-н драфтад нэрээ өгснөөр мэргэжлийн төвшин рүү шилжиж байна.
