Криптовлаютын хамгийн том бирж Binance-ийг АНУ-ын санхүүгийн хууль зөрчсөн хэрэгт буруутгах болжээ. Тодруулбал, АНУ-ын талаас тус биржийг нутаг дэвсгэрт нь хууль бусаар үйл ажиллагаа явуулж байна гэж үзэх болсон байна.
АНУ-ын Түүхий эдийн Фьючерсийн Арилжааны Комиссоос мэдэгдсэнээр Binance компани холбогдох албаныханд хандаж, бүртгэлээ үүсгээгүй байж бизнесийн үйл ажиллагаа явуулсан гэнэ. Үүнээс гадна тус комиссын зүгээс Binance биржийг хэд хэдэн хууль зөрчсөн гэж буруутгасан ч биржийн удирдлагын талаас өөрсдийгөө гэм буруугүй гэж хамгаалжээ.
Тэдний хэлснээр, бирж АНУ-ын иргэдэд платформоо ашиглуулахгүй байх хүрээнд үлэмж их хэмжээний хөрөнгө оруулсан гэнэ. Улмаар тэд АНУ-ын иргэд, оршин суугчид платформ дээр бүртгэл үүсгэхээр оролдоход шууд хаалт тавьсан ажээ.
Тийнхүү Binance-ийн гаргасан мэдэгдлийг үзвэл, “Манай талаас Түүхий эдийн Фьючерсийн Арилжааны Комисстой хоёр жил гаруйн хугацаанд хамтран ажилласан ч тэдний зүгээс биднийг ийн буруутгаж байгаа нь гэнэтийн бөгөөд урам хугалам байлаа” гэсэн байна.
Эх сурвалж: BBC
