2023 он гарсаар дотоодын үйлдвэрлэгчдийн хувьцааны ханш өсөлттэй байна. Тухайлбал: “Монос хүнс” ХК-ийн хувьцааны ханш он гарснаас хойш 18.5 хувиар өсжээ. Харин анх олон нийтэд хувьцаагаа нээлттэй арилжиж эхэлснээс хойш ойролцоогоор 50 хувиар өссөн байна.
Үүнээс гадна Монголын Хөрөнгийн биржийн I ангилалд бүртгэлтэй “Дархан нэхий” ХК 2022 онд 3.7 тэрбум төгрөгийн цэвэр ашигтай ажилласнаа тайлагналаа. Энэ нь өмнөх онтой харьцуулбал 1.6 хувиар өссөн үзүүлэлт болсон байна. Тус компани 2022 оны цэвэр ашгаас нийт хувьцаа эзэмшигчдийн нэгж хувьцаанд 0.27 төгрөг тооцон ногдол ашиг тараахаар шийдвэрлэснийг мэдээллээ.
Харин АПУ ХК-ийн цэвэр ашиг 2022 онд өмнөх оноос 18.7 хувиар буурчээ. 838.8 тэрбум төгрөгийн борлуулалтын орлоготой ажилласан нь өмнөх оноос 23.7 хувиар өссөн үзүүлэлт болж байна. БНХАУ хилээ эргэн нээсэнтэй холбоотойгоор 2023 оноос экспорт нэмэгдэнэ гэсэн төсөөлөлтэй байгаагаа тус компани онцолж байсан юм. Энэ оны эцэс гэхэд хувьцаа эзэмшигчдэдээ нийт 46.8 тэрбум төгрөгийн ногдол ашиг олгохоо мэдээлээд байна.
Түүнчлэн дотоодын өндөгний зах зээлийн 30 гаруй хувийг бүрдүүлдэг "Түмэн шувуут" хувьцаат компанийн орлого 2022 онд 28 хувиар өсөж, 46 тэрбум орчим төгрөг хүрчээ. Цэвэр ашиг нь дөрвөн хувиар өсөж, 7.1 тэрбум болсон байна. Орлогын өсөлт сайн байсан ч цэвэр ашиг нь дөрвөн хувиар өсөхөд борлуулалтын өртөг нэмэгдэж, 32.2 тэрбум төгрөг хүрсэн нь нөлөөлжээ. 2022 онд инфляцын түвшин тогтмол хоёр оронтой түвшинд хадгалагдсанаас үйлдвэрлэгчдийн өртөг нэмэгдэхэд нөлөөлснийг мэдээлсэн юм.
