ОХУ Беларусийн нутаг дэвсгэрт тактикийн цөмийн зэвсэг байрлуулах болсныг Ерөнхийлөгч Владимир Путин мэдэгджээ. Тэрээр энэ талаар Беларусийн Ерөнхийлөгч Александр Лукашенкотой тохиролцсон гэв.
Энэ нь цөмийн зэвсгийг үл дэлгэрүүлэх дэглэмийг зөрчихгүй бөгөөд Минск цөмийн зэвсгийн удирдлагыг авахгүй гэж Путин мэдэгджээ.
Түүнчлэн тэрээр Орос улс Беларусийн цэргийн 10 нисэх онгоцыг тактикийн цөмийн зэвсэг ашиглах зориулалтаар тоноглоход нь тусалсан бөгөөд ийм зэвсэг тээвэрлэх чадвартай "Искандер" пуужингийн системийг Минск руу шилжүүлсэн гэв.
Беларусийн нутаг дэвсгэрт долоодугаар сарын 1 гэхэд тактикийн цөмийн зэвсгийн агуулах барих ажлыг дуусгана гэж ОХУ-ын Ерөнхийлөгч нэмж хэлсэн байна. "Искандер"-ын багийнхныг бэлтгэх ажил дөрөвдүгээр сарын 3-нд эхлэх гэнэ.
Владимир Путин ийм шийдвэр гаргасан нь Их Британийн Батлан хамгаалахын дэд сайд Украинд урантай сум нийлүүлэх гэж байна гэсэн мэдэгдэлтэй холбоотой гэжээ.
Украин улсын хүлээн авах "Челленжер-2" танкийн их бууны дотор шавхагдсан ураны /урантай ижил шинж чанартай ч хорт болон цацраг идэвхт бодисын хэмжээ 60 орчим хувиар бага хүнд металл/ сум байгааг Их Британийн эрх баригчид өмнө нь хэлж байв. Гэвч барууны эрх баригчид болон шинжээчид ийм сумнууд нь хүнд техниктэй тэмцэх зориулалттай бөгөөд цөмийн зэвсэгтэй ямар ч холбоогүй гэдгийг сануулсан байна.
Эх сурвалж: ВВС
