Сагсан бөмбөгийн Үндэсний дээд лигийн хасагдах шатны тоглолтууд дөрвөн багийн хооронд гал гарсан өрсөлдөөн дунд үргэлжилж байна. Тэнүүн Өлзий Металл, Завхан Бродерсын өмнөх хоёр тоглолт ширүүн өрсөлдөөн, ойрхон онооны зөрүүн дээр дэнслэгдэж Металл 2 ялалтыг өөрийн болгож 2-0 гэсэн давуу талыг үүсгээд байсан юм.
Тэгвэл цувралын гурав дахь тоглолтод агентийн асуудлаас болж Олон улсын сагсан бөмбөгийн холбооноос (FIBA) түр хугацаанд тоглолтод оролцох эрхээ хязгаарлуулаад байсан Завхан Бродерсын импорт тоглогч Даймонд Стөүн эргэн ирж багаа оноо авалтаар тэргүүлж цувралыг ойртуулж чадлаа. Мөн багийн холбогч Д.Мөнхтүвшин бэртлээсээ эргэн ирснээр Бродерс бүрэн бүрэлдэхүүнээрээ илүү нягт хамгаалалт, довтолгоотой тоглолтыг үзүүлж цувралын харьцааг 2-1 болгож чадсан юм.
ОНЦЛОХ ТОГЛОГЧ: Даймонд Стөүн хасагдах шатны хагас шигшээ цувралын эхний тоглолтдоо 31 оноо, 12 самбар авч дабл дабл гүйцэтгэлээ. Цувралын хоёр дахь тоглолтыг өнжсөн Д.Мөнхтүвшин эргэн ирж 19 оноо, 8 оновчтой дамжуулалт өгч хожил авчирахад том тус хүргэлээ .
ТОГЛОЛТЫН ЭРГЭЛТИЙН ЦЭГ: Хоёрдугаар үеийн сүүлийн 5 минутад Завхан Бродерс баг 18 оноо авсан бол Тэнүүн Өлзий Металл баг 7 оноо авч улмаар 25 онооны зөрүүтэй эхний хагас өндөрлөсөн. Хожил авсан Завхан Бродерс багаараа 21 оновчтой дамжуулалт өгч, 49.4 хувьтай довтолсон. Мөн Завхан Бродерс багийн сэлгээ 58 оноо авсан бол Тэнүүн Өлзий Металл багийн сэлгээ ердөө 19 оноо авсан байна.
