АНУ-ын мөнгөний бодлогыг тодорхойлогч гол байгууллага болох Холбооны нөөцийн сангийн (ХНС) зүгээс бодлогын хүүгээ дахин өсгөх шийдвэр гаргаснаар америкчуудын зээлийн картын өр урьд өмнө байгаагүй өндөр хэмжээнд хүрээд зогсохгүй өдөр ирэх тусам хүмүүсийн өрийн хэмжээ нэмэгдэхэд хүргэж байна.
Зээлийн хүүг нэмэгдүүлэх нь үнийн өсөлттэй тэмцэх зорилготой ч зээлийн картын өртэй хүмүүсийн жилийн эргэн төлөлтийн хувь хэмжээг (APR) нэмэгдүүлж, хүү өсөхөд нөлөөлдөг аж. АНУ-ын ХНС орон нутгийн цагаар 22-ны өдөр бодлогын хүүгээ дахин 0.25 нэгж хувиар нэмэгдүүлэх шийдвэр гаргасан талаар бид өмнө нь мэдээлж байсан билээ.
Инфляцын өсөлт өндөр хэвээр байгаа энэ үед хүмүүс өдөр тутмын худалдан авалтаа зээлийн картаар шийдэх нь нэмэгдсээр байна.
Пенсильвани мужийн Голден Корал хотын оршин суугч 46 настай Лэнс ДеЖесус “Асуудлын гол нь улс орны эдийн засгийн өнөөгийн нөхцөл байдал болон инфляцын өсөлттэй шууд холбоотой. Жилийн өмнөхөн л гэхэд хүнсний дэлгүүрээс 100 ам.доллароор нэлээд их хэмжээний хүнс худалдаж авдаг байсан бол одоо багахан хүнс авахад л 100 ам.доллар хүрчихдэг болсон” хэмээн тэрээр халаглан өгүүлэв. Тэрээр одоогоор 2600 долларын зээлийн картын өртэй бөгөөд эргэн төлөлтийн хүүгийн хувь нь 16.99%-21.99% хооронд хэлбэлзэж байгааг дурдсан байна.
Санхүүгийн мэдээллийн онлайн сайт болох Bankrate-ийн мэдээлснээр америкчуудын 46 хувь нь сар бүр өр төлдөг гэжээ. Ердөө жилийн өмнө энэ үзүүлэлт 39 хувь байсантай харьцуулахад энэ нь нэлээд огцом өссөн үзүүлэлт юм. Түүнчлэн зээлийн картын өрийн жилийн дундаж эргэн төлөлтийн хувь 20.4 хувь байгаа нь 1980-аад оны дунд үеэс хойших хамгийн өндөр үзүүлэлт болж байгаа аж.
Ассошиэйтед Пресс агентлаг болон NORC Олон нийттэй харилцах судалгааны төвөөс явуулсан шинэ санал асуулгаар Америкийн насанд хүрэгчдийн 35 хувь нь өрхийн өр нь жилийн өмнөхтэй харьцуулахад нэмэгдсэн гэх хариултыг өгсөн бол ердөө 17 хувь нь буурсан гэж хариулсан байна.
ХНС-ийн мэдээлснээр, 2022 оны дөрөвдүгээр улиралд АНУ-ын зээлийн картын өр 61 тэрбум ам.доллароор нэмэгдэж, 986 тэрбум долларт хүрсэн нь өмнөх оргил үе болох 927 тэрбум ам.доллароос даваад байгааг онцлон тэмдэглэсэн юм.
Эх сурвалж: Newsis
