Нийслэлийнхэнд утаа, түгжрэл хоёр толгойны өвчин болоод удлаа. Түгжрэлийг бууруулах тухай олон жил яригдсан ч өнөөдрийг хүртэл тодорхой шийдлээ олоогүй, түгжрэл буураагүй, улам нэмэгдсэн байна. Аргаа бараад түгжрэл бууруулах сайдтай болоод ч асуудал хэвээрээ.
Түгжрэлийн асуудлыг шийдвэрлэх, нийгэмд эдийн засгийн үр ашгаа өгөх томоохон төслөөс цаасан дээрээс цааш гавиагүй нь олон. Жишээ нь “Агаарын дүүжин тээвэр”-ийн төсөл. Улаанбаатар хотод анх удаа “Агаарын дүүжин тээвэр нэвтрүүлнэ" гэж Шадар сайд С.Амарсайхан Нийслэлийн Засаг дарга байх үедээ танилцуулаад энэ төсөл замхарсан, алга болсон гэхэд нэг их хилсдэхгүй болов уу.
С.Амарсайхан Нийслэлийн Засаг дарга байхдаа “2021 оны зургадугаар сард эхний маршрут буюу Баянхошуу, Ханын материал, 3, 4 дүгээр хороолол чиглэлд ашиглалтад орно" хэмээн хэлж байв. Гэвч өнөөдөр 2023 он гарч, агаарын дүүжин тээврийн бараа байсангүй.
2021 оны арванхоёрдугаар сарын 31-ний өдрийн НИТХ-ын Тэргүүлэгчдийн хуралдаанаар "Дүүжин тээврийн ашиглалтын өмнөх захиргаа” орон нутгийн өмчит төсөвт үйлдвэрийн газрыг татан буулгасан билээ. Өчнөөн хөрөнгө мөнгө санхүү, ажилчдын цалин хөлсийг төлж байснаа гэнэт татан буулгасан. Нөгөө л татвар төлөгчдийн мөнгийг салхинд үрэн таран хийлээ гэсэн шүүмжлэл их гарсан. Хоёр жилийн нүүр үзээгүй татан буугдсан болохоор дээрх төсөл зогссон гэж ойлгож байв. Гэвч Шадар сайд С.Амарсайхан үгүйсгэж “Агаарын дүүжин тээвэр төсөл цаашид үргэлжилнэ” гэх тайлбар өгсөн.
Тэрбээр “Энэ төсөл цаашид үргэлжлэх ёстой. Зогсч байна гэж ойлгохгүй байна. Өмнө нь байгуулсан төслийн ажлын хэсэг, нэгж, зохион байгуулалтыг өөрчилж шинэчилж байна гэж ойлгосон. Өмнө нь НИТХ-ын тогтоолоор батлагдаж байсан бол Сангийн яамны шийдвэрээр өөрчилж яам, нийслэлтэй хамтран үргэлжлүүлнэ” гэсэн юм.
Энэ талаар нийслэлийн Зам, тээврийн асуудал хариуцсан төслүүдийн удирдагч Б.Одсүрэн “Агаарын дүүжин тээврийг цаашид үргэлжлүүлнэ. Гэхдээ хэзээнээс хэрхэн хэрэгжих тухай гуравдугаар сарын сүүлчээр тодорхой болно. Одоогоор бүтэц зохион байгуулалтыг шинэчлэхээр ажиллаж байна. Цар тахлын улмаас гадаадаас ажиллах мэргэжилтнүүд болон дүүжин тээврийг оруулж ирээгүй” гэж ярьсан удаатай. Францын талаас агаарын дүүжин тээвэр нэвтрүүлэх төслийг санал болгосны дагуу хэрэгжүүлэхээр болсон уг төслийг чиглэл мөн л тодорхойгүй байгаа.
Тэгвэл удаан хугацаанд яриад гацсан төсөл болох дүүжин тээврийн ирэх 2024 онд ашиглалтад оруулна гэдгийг өчигдөр Хотын сайд Ж.Сүхбаатар хэлжээ.
Тэрбээр “Удаан хугацаанд яриад гацсан төсөл нь дүүжин тээвэр. Миний хувьд дүүжин тээврийн төслийг Францын талтай тохирсон. 2024 оны зургаадугаар сараас өмнө дүүжин тээврийн эхний шугамыг ашиглалтад оруулна. Төслөө хэрэгжүүлнэ, ажлыг урагшлуулж байна. BRT хамгийн хурдан хугацаанд хэрэгжих боломжтой төсөл. Санхүүжилтийн эх үүсвэр ерөнхийдөө шийдэгдсэн. УИХ-аар батлуулахаар оруулах асуудал байгаа юм. Тусгайлсан эгнээ бүхий автобус буюу BRT-г Энхтайваны өргөн чөлөө юмуу Ард Аюушийн өргөн чөлөөний аль нэгээр явуулна. Төлөвлөсөн ёсоор ирэх жилээс ажил нь идэвхжих дүр зурагтай. Дүнжингаравын орц, гарцын асуудал хөрөнгө, мөнгөний асуудлаас удааширч буй. Ойрын үед Гурвалжин, Хархорин захад ажиллана. Алтай хотхонд ч очиж хийгдэх бүтээн байгуулалтын нөхцөл байдлыг судална" гэжээ.
Уг нь 2021 онд ашиглалтад орох ёстой агаарын дүүжин тээвэр 2024 он болтлоо хойшилсон. Орж ирэх ёстой хугацаандаа орж ирээгүй шалтаг шалтгаан нөхцөл цар тахал байжээ. Одоо ямар нэгэн цар тахал нийгмийн асуудал байх биш, хэлсэн ёсоор ирэх 2024 онд ашиглалтад оруулж, Нийслэлчүүд агаарын тээврээр зорчиж, авто замын түгжрэл буурахыг л харах цаг үлджээ.
