Ээжийнхээ хамтран амьдрагчийн хүчирхийлэлд өртөж, ГССҮТ-д ухаангүй хүргэгдэн ирсэн гурван настай хүү чадварлаг эмч нарын 14 хоногийн эмчилгээний үр дүнд зохиомол амьсгалын аппаратаас гарч, өөрийн амьсгалтай болоод байна. Харин хүү ухаан ороогүй хэвээр байгаа юм. Ингэснээр “амь нас эрсдэх” аюулаас аврагдаж байгааг эмчлэгч эмч нь хэлсэн тул хүүгийн аав Туркийн эмнэлэгт хүүгээ аваачиж, эмчилгээ хийлгэхээр шийдэж, эмчилгээний зардалд туслахыг Монголын ард түмнээс хүсээд буй. Одоогийн байдлаар яг аль эмнэлэгт ямар эмчилгээ хийлгэх нь тодорхойгүй байгаа бөгөөд эмч нарын хэлсэн зэрэг мэдээллээр 120-150 сая төгрөг шаардлагатай гэсэн юм.
Тэгвэл Ц.Батзаяа хүүгийн хандивт нэг хоногийн хугацаанд 50 сая төгрөг ирсэн талаар аав нь хэллээ.
Түүний аав өчигдөр хэвлэлийн хурлын үеэр, "Эхний ээлжид би хүүгээ л цаг алдалгүй эмчилгээнд нь явуулмаар байна. Шийтгэл авах хүмүүс нь хуулийн дагуу хариуцлагаа хүлээх байх, түүнийг би яриад яахав. Хүүгийн биеийн байдал багагүй дээрдсэн байгаа. Цаг алдалгүй эмчилгээ хийлгэхэд Монголын ард түмнээсээ тусламж хүсэж байна" гэсэн юм.
“Найдваргүй” хэмээгдэж байсан 3 настай хүү ямар ч байсан үхлийн аюулыг давж чадсан нь олон хүнд санаа амран тайвшрах шалтгаан боллоо. Одоо хүүг хөл дээр нь босгож, эрүүл саруул болоод ахтайгаа тоглон гүйхийг хүлээх л үлдэж байна. Үүний тулд сайхан сэтгэлт та бүхэн тусламжийн гараа сунгаарай.
